Vawin chawhnu dar 2 khan 1st NECS Cup Football Final chu AR Ground-ah khelh a ni a; Ramhlun South Local Council Team leh Durtlang Leitan Local Council Team te inkhelin,hun pangngai a an inhnehtawk hnu in Penalty Shoot out ah Ramhlun South Local Council Team chu 5-3 in an vannei ta zawk a, NECS Cup a champion hmasa ber an ni ta a ni. Champion Team hian Home Minister kuta tangin Trophy leh cheng 13,0000 an dawng a; Runners up Durtlang Leitan Local Council Team te hian Trophy leh Cheng 7,5000 an dawng bawk a ni. he tournament ah hian Lalchhuankima, Durtlang Leitan player chu Best Player atan thlan a ni.

Final khelh hmaa inkhawmah Home Minister Pu R. lalzirliana chuan thu sawiin, “Inthlan hmaa kan tiam ang ngeiin sorkar chuan thalaite khawvel thar a siam mek zel a; infiammite tan khelmual tha te kan buatsaihin, infiammi ten nasa takin hma kan sawn a ni”, a ti. Pu R. Lalzirliana chuan infiammi te chu nun uluk tur leh hmasawn zel tura fuihin, “India ram Club hrang hrangah Mizo tlangvalten football kan khel ; hei mai hi duhtawk lovin Season thara I League khel pha Club nei tura tanlak a ngai a. Sorkarin khelmual tha a pe che u a; infiammi tha erawh nangmahni lam atanga chhuak tur a ni”, a ti.

He Aizawl District Inter-Village Football Tournament-ah hian Team 96 an tel a; final thleng hian goal 476 lut tawh in, Yellow Card mi 284 in an hmu tawh a, Red Card hmu mi 31 an awm tawh bawk. NECS Cup hi kum tina neih chhoh tum a nih thu TT Group Chief MD Pu Romawia Royte chuan a sawi.