Mizote zinga khawvela tlang sang ber Mt.Everest (29035 ft) lawn chhuaktu hmasa ber Pu David Zohmangaiha leh Base Camp Manager Pu Vanlalliana te chu vawiin khan Aizawl an lo thleng a, sorkarin anmahni lawmna inkhawm Vanapa Hall-ah a buatisaihah Mizoram Larsap Pu Vakkom Purushothaman chuan lawmpuina tangkfai a hlan ve ve a ni.

Sports & Youth Services Secretary Pu R.Vanlalvena kaihhruai inkhawmah hian Mizoram Governor chuan Mizoram tan hun lawmawm leh chhinchhiahtlak tak a ni, a ti a. Pu David Zohmangaiha chuan Mizote tan rahbi thar a siam a, a hlawhtlinna chuan thalaite tan chona lian tak a siam bawk a ni, a ti. Base Camp Manager Pu Vanlalliana inpekna chu fakin tanrualna leh thawhhona tha hian rah duhawm tak a chhuah fo reng a ni, a ti. Mizoram sorkar chuan infiamna chi hrang hrang hmasawnna turin tan nasa takin a la mek a, chung zingah Mizo thalai (mipa leh hmeichhia) engemawzat ten tlanglawn zira training zo tawh te an awm a, tlanglawn mai bakah hemi lama a zau zawka zirna (research) leh chhanchhuahna hna pawh an thawk thei chu an chhuanawm hle a ni, a ti. Mizoram leilung hian a zir bawka adventure sports lamah thalai tam zawk ten rilru pe thei se a duh thu leh ruihtheihthil leh thil tha lo dang hawisan turin a chah bawk. Mizoram Larsap hian Mizoram sorkar aiawhin Pu David Zohmangaiha hnenah lawmman tangkafai cheng nuai 5 leh Pu Vanlalliana hnenah cheng nuai 3 a hlan nghal a ni.

Hmarchhak bial state hrang hrang 6 atanga member 16 telna, ‘1st N.E. Mt.Everest Expedition’ Team hi North Eastern Council bultum sak niin, a huaihawt leh buaipuitu erawh chu Manipur Mountaineering & Trekking Association (MMTA) a ni thung. NEC-in Expedition Team member-te cheng nuai 18 theuh a tum sak bakah Mizoram sorkar Sports & Youth Services Department chuan David Zohmangaiha, Climber hi cheng nuai 2-in a pui a; Pu Vanlalliana hi cheng singnga a pe bawk a ni. Pu David Zohmangaiha hian May ni 18, 2013 zing dar 5:30AM-ah Mt.Everest tlangchhip a lawn chhuak a ni. Pu Vanlalliana hi Base Camp Manager a ni a, tlanglawntu te mamawh chi hrang hrang fel taka lo enkawltu a ni.

Vawiina tlawnglawn pahnihte lawmna inkhawmah hian Pu David Zohmangaiha leh Pu Vanlalliana te hian an Expedition chungchang an sawi a. He inkhawmah hian Mizoram MP (Lok Sabha) Pu C.L.Ruala pawhin lawmpuina thu a sawi bawk a; Republic Veng Local Council Chairman Pu Vanlalruata leh Maubawk Veng Local Coucil Vice-Chairman Tv.Lalramliana Zote te pawhin thu an sawi a ni.