Vawiin khan Art & Culture Department chuan State Central Library Reading Hall, New Secretariat Complex-ah 1st Public Library Day an hmang. Pi Rosangpuii, Secretary, Art & Culture chu khuallian niin inkhawm hi Pu R. Hmingthanzuala, Director, Art & Culture in a kaihruai a ni.

Pi Rosangpuii chuan Public Library te hi vengtin leh khawtina zirlaite leh mipuite hian a tangkai thei ang bera hman tum ila, zirlai leh scholar te leh lehkhazir tawh lo mipui vantlang hrim hrim pawh hian Library a lehkhabu tha tak tak awmte chu hriatzau nan hmang tangkaia lehkha chhiar tam nana hmang tam turin a duh thu a sawi. Internet khawih nasat avanga naupangten lehkhabu tha chhiar nachang an hre tawh lo chu vawiin Public Library Day atang hian lehkha chhiar uar thar turin a a fuih.

India khawtlang nun siamthatna atana thawktu, ram leh hnam hmangaih tu ‘Social Reformer ropui Raja Rammohan Roy’ a pian champha  22 May, 2015 hi Raja Rammohan Roy Library Foundation (RRRLF), Kolkata, Ministry of Culture, Govt. of India chuan a tum khatna atan Public Library Day atan a puang thar a. Central sorkar enkawl RRRLF hi 1972 atanga din a ni a, a dinchhan bulpui ber chu India ram puma Public Library tih hmasawnna tur atana hnathawh a ni a. RRRLF hian Matching leh Non Matching Scheme hnuai atangin Public Library enkawlna leh tihhmasawnna atan tanpuina (assistance grant) India ram state hrang hrangah a pechhuak thin a ni. RRRLF Matching Scheme hnuaia tanpuina scheme rinchhan hian sorkar recognised NGO Public Library 467 lai Mizoramah hian a awm tawh a ni.

Mizoram State Library ah hian 2014 - 2015 kalta khan lehkhabu 56862 data entry tih a ni tawh a, Library member adult 4743, naupang 790 an awm. Lehkhabu rare book digitised 316 neih chhoh mek a ni bawk.