Rajya Sabha MP Pu Ronald Sapa Tlau-i’n SAGY Programme hnuaia Model Village atana siam tura a thlan Chhiahtlang khua tihhmasawnna tur (Village Development Plan) chu Pu Ronald Sapa Tlau hovin SAGY Line department hrang hrangte leh Chhiahtlang Village Council aiawh ten uluk taka DRDA Conference Hall, Serchhipah an sawiho hnu in nizan dar 7:30 khan pawm fel a ni a; Village Development Plan Document hi Pu Ronald Sapa Tlau, MP, Rajya Sabha, Pi Rohnuni Colney, Charge Officer leh Pu C.R.Dothanga, VCP, Chhiahtlang ten hming an ziah hnan a ni.

Chhiahtlang Model Village atana siamna tura ruahmanna (Village Development Plan) hi Line Department hrang hrang 20 te’n Chhiahtlang khaw mipuite nena inrawn tlanga an siam a ni a, Line Department te hian Plan hrang hrang siamin priority nambar 1, 2, leh 3 ah an thliar hrang leh a, heng te hi Rajya Sabha MP leh Chhiahtlang khawtlang aiawhte nen uluk taka sawiho leh niin siamthat ngai te an siam that bakah, paih ngai leh belh ngaite an chingfel bawk a ni.

Pu Ronald Sapa chuan SAGY Line Department te thawhrimna leh taimakna chu fakin . SAGY hnuaia Model Village Development Plan siamna tura Baseline Survey neih tura tih chu India rama zo hmasa ber leh report kimchang thehlut hmasa ber an nih avangin lawmthu a hrilh a, hei hian an theihna leh inpekna a tilang chiang hle a ni tiin an chunga rinna a nghat takzet a ni tih a sawi a, SAGY atan hian sawrkar Laipuiin a hranpa a sum a dah (allocate) loh avangin beisei ang leh duhthusam anga hma a lak theih loh pawhin theihtawp chhuahsak turin a ngen a, hemi chungchang hi Parliament ah pawh na taka a sawichhuah tawh thu a sawi bawk. Rajya Sabha MP chuan Infrastructure Development a pawimawh em em rualin Human Development leh Moral Development hi ngaihthah theih a nih loh mai bakah hmasawnna bulthum ber zawk ani tih sawiin Chhiahtlang mipuite rilru sukthlek dik chu khaw dangte tan entawn tlak/ model anih ngei a beisei thu a sawi bawk a, SAGY hnuaia hmalakna reng reng hi hunbi nei (time-bound) a thawh ngai annih avangin tha thlah lova tan mar pat a tul dawn ani tih a sawi bawk a ni.

Model Village Development Plan hi May thla ral hma a Sawrkar laipuia thehluh tur a ni a, annin an lo endik hnu ah pawm tur chin an lo thliar fel ang a, July thla atangin hma lak tan nghal tur a ni ang. SAGY hi October ni 11, 2014 khan Prime Minister Narendra Modi-a’n a hawng a, he scheme bultan nan Lok Sabha leh Rajya Sabha MP te chu an Constituency chhunga khaw pakhat ve ve (an pianna khua leh an nupuite pianna khua thlan phal ani lo thung) thlang tura tih an nih angin Rajya Sabha MP hian Serchhip District-a Chhiahtlang khua a thlang a, Lok Sabha MP Pu CL Ruala pawhin Serchhip District ami tho Khawlailung a thlang bawk a; Khawlailung Village Development Plan hi karleh ah sawihova pawm a ni thung ang .