Phaizau mipuiten an khaw kawng thalo chungchang lungawilohna leh Mamit khaw chawmtu PHE Tui pump-na dan chah an tum thu an puanzar bawhzuiin vawiin khan Mamit DC Pu Vanlalngaihsaka kaihhruaiin District Official te leh Phaizau khua a NGO hruaitu te’n DC Conference Hall, Mamitah inkawmna an nei.
Pu Vanlalngaihsaka chuan in vau zawnga thil kar thin chu tha a tih loh thu sawiin,Phaizau khaw kawng chhia chu an ngaimawh thu leh a siamdan tur kawng hrang hrang an dap reng thu leh theih tawp an chhuah thu a sawi.
Phaizau NGO hruaitute chuan an khaw kawng chhiat vanga zirna,eizawnna leh hmasawnna hrang hranga an hnufual phah dan sawiin, kawng tha an mamawh dan te an sawi tel bawk.
PWD (Road) Mamit bialtu Pu Lalbiakthuama, SDO chuan PMGSY hnuaia hmalak mek anih dan sawiin, Phase 8 hnuaiah Phaizau kawng chu telh a ni a, sorkar laipui lamah DPR thawn anih tawh thu leh Phaizau NGO hruaitu te’n an hriatfiah tawk loh lai te a sawi fiah a ni.
Phaizau lamin fur pui thlen hma a hmalak dan ngaihtuahpui tura an ngenna chu hmalakna awm sa mek nen a bawhzui dan tur ngaituah zel anih tur thu thuneitu ten an sawi a ni.
