Sawrkawr Laipuiin thingtlang lam thalaite tana sports-a an hmasawnna tura ruahmanna a siam Panchayat Yuva Krida Khel Abhiyan (PYKKA) chu Mizoram-ah pawh chak taka kalpui zel a ni a. Mizoram State Sports Council hnuaia PYKKA Cell buatsaihin thingtlang khaw hrang hranga sports trainer (Kridashree) turte training hmasaber 1st State Level Kridashree Training chu Ramhlun Sports Complex-ah January ni 20-27, 2010 chhung neih a ni dawn a. Vawiina Training hawnna inkhawm neihah Sports Minister Pu Zodintluanga chu Khuallian niin, Sports Secretary Pu Nghaklianmawia leh Sports officials engemawzatin an hmanpui bawk. Mizoram hi India ram state zingah Kridashree Training nei hmasa ber a ni nghe nghe.

 

 

Sports Minister chuan PYKKA avangin sports discipline hrang hrang national level-ah pawh Mizoram chu hma a sawn chak zia sawiin Mizo faten zirtirna leh training tha an dawn chuan an thleng sang thei hle a ni, a ti. Sports hi intihhlimna leh infiamna mai mai anga ngai tawh lovin, eizawnna tling a ni tih hriain Mizo thalai talent nei tha tak tak te chuan an tana sawrkar hmalakna chu chhawr tangkai thiam turin a chah bawk. Mizo footballer 200 chuang India hmun hrang hrang-ah an inkhelh thu sawilangin Minister chuan heng zinga tam zawk chu thingtlang ami niin an tumruhna leh taimakna avanga tun dinhmun thleng thei an ni a. PYKKA hi sawrkarin a ngaih pawimawh thu sawiin Pu Zodintluanga chuan vawiina training nei turte pawhin an khaw lama an kir leh hunah an bial chhung tlawh kual a, rilru inpekna tak tak nen thalai inkhel thiamte chu zirtirna dik pe taima turin a chah a ni.

Sports Secretary Pu Nghaklianmawia pawhin thu sawiin sports-a tui tak leh thalaite talent nei tha tak tak chherchhoh kawnga sawrkar chak tak kan nei hi Mizoram vanneihna a ni a, “sports revolution” a thleng a ni, a ti.

Panchayat Yuva Krida Khel Abhiyan (PYKKA) hnuaiah kum 2008-2009 chhung khan sports tihchangtlunna tur tanpuina khaw 82 leh Block 3 hnenah pek a ni tawh a, kumin chhung hian khaw 242 leh Block 8 hnenah pek a ni leh dawn a ni. Aizawl leh Lunglei District Sports hmasawnna atan cheng nuai 2 dah belh a ni a, District dang 6 te tan cheng nuai 1 dah a ni thung. Phai lama sports inelnaa Mizo players te zin vah nan cheng nuai 20 dah a ni bawk.