Kar kalta Zirtawpni khan Home Minister Pu R. Lalzirliana kaihhruaina hnuaiah kum 2009 Krismas leh kumthar 2010 vuakvet laia Aizawl khawpui chhunga halpuah leh halmawi chi hrang hrang khap leh khap loh chungchangah sorkar mipawimawh leh tlawmngai pawl aiawhte an thukhawm a. In pawh leh huamzau taka sawiho anih hnuin rawtna hrang hrang siama thurel a ni ta.

An thurel zingah chuan halpuah leh halmawi chi hrang hrangte hi nunphung pangngai khawih buai thei, a thlawna sum tam tak sen ralna bakah hun pawimawh krismas leh kumthar ti buai thei a nih avangin kumin ah hi chuan hneh tak leh khauh taka khap nise, kumhlui thlah zanah pawh hal hun hawn  nilo se tih a tel a. Chubakah Committee chuan DC zawng zawngte chu he khapna thupek hi chhuah turin Home Deptt. in hriattir se; Halpuah leh halmawi  lakluhna kawng dunga check gate nei department zawng zawng ten heng thil la lut tu leh an thil lak luh te man hna ngawrh taka thawk turin tih an ni. Khapna thupek hi I & PR Department ten an puangzar ang a. Central YMA pawh he khapna thu hi puangzar tur leh a bik takin Darlawn-a General Conference ah hian branch tinte hriat atan uar taka puang turin ngen an ni a khapna thupek kenkawh pui tur hian branch tin YMA te chu ngen an ni bawk. Halpuah leh a zuartu/laluttu mihring man an nih chuan dan angin case siam sak a, prosecute nise. Halpuah mante chu court order ang zelin a hlawma tih chhiat hun siam nise tih rel a ni bawk a; District Magistrate zawng zawng hnenah an huamchhung-a Security Force te, Central Paramilitary Force te leh mipui mimir te khapna thu hi zawm ngei tura hriattir turin Home department in a hriattir ang a hetiang khapna thupek hi a zau thei ang berin chanchinbu, Radio leh TV kaltlangin Home department chu puanzar tir tura beisei a ni.

Krismas leh Kumthar vuakvet laia halpuah khap thu hi District dangah pawh chak taka kalpui rel anih angin district khawpui tinah veng hrang hrang halpuah khap kawnga thawk tha te an hnathawh hriatpuina leh lawmthu sawi nan YMA branch wise-in inelna thianghlim neih a ni ang a, lawmman dawng tur endik leh thlang turin CYMA/Sub-Hqrs. YMA ngen an ni a. Lawmman tur chu 1st Prize - Rs. 10,000/-, 2nd Prize Rs. 7,000/- leh 3rd Prize Rs. 5,000/- bakah consolation prize 5 (panga) Rs. 1000/- theuh pek an ni ang.

Mizoram District Capital zawng zawnga khapna kenkawh leh lawmman siam nan hian Rs. 5,00,000/- zet mamawh tura rin a ni a, he sum mamawh hi Planning Department hnenah a tul anga lo bawhzui turin Committee chuan Home department a ngen nghal a ni.