662/2026-2027

Dated Serchhip, 22^nd May 2026: Vawiin khan Mizoram Handloom & Handicrafts Development Corporation Limited (ZOHANDCO) hmalaknain puantah zirna Handloom Training leh puantahna khawl (Zo Loom) semna hun CT Hall, Chhuanthar Tlangnuam-ah hman a ni. Agriculture & Farmers' Welfare Minister Pu P.C. Vanlalruata’n khuallian niin hun a hmanpui a, ZOHANDCO Managing Director Pu L.P. Lalchangkima'n hun hawnna inkhawm hi a kaihruai a ni.

Khuallian Pu PC Vanlalruata chuan Chhuanthar Tlangnuam mipuite taihmakna leh thawhrimna fakin, puan tah lama hma an lakna turah pawh beiseina sang tak a neih thu a sawi a. Puana sum dawnna hi Mizoram economy chawi nungtu pawimawh tak pakhat a nih thu sawiin, Mizo kutchhuakte chawinung tura ZOHANDCO te hmalaknaah lawmthu a sawi a. ZOHANDCO kaltlangin ram pawna mizo kutchhuak puan leh thiamhnangdeh chi hrang hrangte zawrhchhuahna tur pawh zawn zel a nih thu sawiin, India ram khawpui – Delhi, Bangalore leh Kolkata-ahte pawh mizo kutchhuak thil zawrhna ‘Made By Mizo’ dawr hawnna tur pawhin hma lak mek a nih thu leh inbiakna kalpui mek a nih thu a sawi bawk. Mizote kutchhuak chawisan chu sawrkarin a ngai pawimawh hle tih sawiin ZOHANDCO hmalaknaa Chhuanthar mipuite tana puantah khawl 9 zet sem theih a ni chu lawmawm a tih thu a sawi a. Training turte pawh thiamna tak tak pawchhuaka, mahni kea ding thei tur leh Mizoram tana malsawmna ni turin duhsakna a hlan a ni.

Training hi thla khat chhung neih phawt tur niin, mi 45 an tel dawn a, trainer thiam tak takte'n an thutchhilh dawn a ni. A tirah chuan puan ban sa hmangin zirtirna an nei phawt dawn a, hei bakah hian mi 2 thlang chhuakin, puan ban, hnahchawi thil, reed thil leh a tul dangte zir belh turin Aizawl lamah training kalpui leh turin ruahmanna siam a ni bawk.

Vawiin hun hmanna-ah hian ZOHANDCO Chairman Pu J.K. Dawngzuala hnen atangin an hmalakna tlangpui ngaihthlak a ni a; Pu Rodingluaia, Assistant Manager, ZOHANDCO-in Training kalpui dan tur leh puan tah khawl chungchanga Technical Report a pe bawk a. He hun hmanpuitu Mizoram Khadi & Village Industries Board (MKVIB) Chairman Pu C. Lalremliana pawhin thu sawiin, Mizo thalaite’n mizo thiamhnangdeh lamah inzirtirna leh training uar lehzuala kan neih a pawimawh thu a sawi a. Multidisciplinary Training Centre Aizawl-ah Training duh tan kawng a inhawn thu a sawi bawk. Chhuanthar Tlangnuam Village Council President Pu Dawngzela'n lawmthu sawiin hun hi a khar a, chawhnu lamah Demonstration neih zui a ni.