663/2026-2027

Dated Serchhip, 22^nd May 2026: Vawiin khan India Rama Telecom service lama thuneitu sang Telecom Regulatory Authority Of India (TRAI) te chuan Serchhip-ah Consumer-te nenea intawhkhawmna hun ‘Consumer Outreach Programme’ an buatsaih a. He Programme Serchhip Sub Hqrs. YMA Conference Hall-a hmanah hian Serchhip Bawrhsap Pu Paul L. Khuma chu khuallian niin, Serchhip Superintendent of Police Gavit Gogna, IPS chu khualzahawm a ni a,  Advisor, TRAI Regional Office Kolkata Shri Kaushik Mukherjee chuan inkhawm hi a kaihruai a ni.

Serchhip Baswrhsap Pu Paul L. Khuma chuan Mizoram-a a vawi 3-na atan Serchhip-ah hetiang Programme tha leh hlu tak buatsaih a ni thei chu lawmawm a tih thu sawi a. Telecom Regulation Act hnuaiah consumer ten dikna chanvo (right) tam tak an neih thu sawiin, Serchhip District chu  lehkha thiam, ziak leh chhiar thiam tamna ber an nih angin, telecom service chungchangah a ni emaw,eh thil dangah a ni emaw, consumer-te dikna chanvote hi mipuite’n kan hriattlan a pawimawh tih a sawi a. Buaina leh harsatna kan nei a nih pawhin ‘dan hnuaiah felfai leh zahawm taka complain nachang hriat a pawimawh a ni’ a ti bawk. Serchhip District-in Consumer Association chak tak an nei chu lawmawm a tih thu sawi bawk a, vawiina he hun hmangtu zawng zawngte chu consumer-te dikna leh chanvote hre thar a, tangkai leh hlawk taka hun hmang theuh turin a chah bawk a ni.

 He huna khualzahawm Serchhip SP Pu Gavit Gogna IPS pawhin tunlai khawvel thiamna sang tawh tak karah Telephone leh Internet hmangtute’n mahni hming leh nihna diktak hmanga Sim card neih a pawimawh thu a sawi a, chu chuan Cell/Mobile phone tih bo leh inbumna hrang hrang  Cyber Security & Cyber Offensive thleng thin lakah Police te tana hnu chhui a tih awlsam bik thu a sawi bawk.

Ashim Dutta, Jt. Adviser, TRAI leh Mizoram-a Telecom hotute atangin mipuite hriat tur pawiamawh chi   hrang hrangte, a lem nen sawifiah a nih bakah, Pi Larinzuali MPS, SDPO Serchhip hnen atangin 'Cyber Crime Awareness' chungchang ngaihthlak a ni a, zawhna leh chhanna hun hlawk tak hman ho a ni bawk.

Vawiina huna hmannaah hian Serchhip District Consumer Association hruaitu te, District Sub Hqrs. YMA leh District  MUP hruaitu te, Govt. Serchhip Higher Secondary School leh Govt. Serchhip  College-a   zirlai te, Serchhip District chhunga Telecom service provider hrang hrangte bakah tualchhung chanchinbumite an tel a ni.