562/2024-2025

Dated Siaha 26th May 2024: Nimin chawhnu khan Major Raj Kishor, Company Commander, 20th Batallion Assam Rifles hmalaknain Mizoram Journalist Association, Siaha leh Assam Rifles- te chuan inkawmhona 20th Battalion Assam Rifles- awmna hmunah neih niin hun tha tak hmanho a ni.

Major Raj Kishor chuan sipai lama luh tum thalaite hnenah a thlawna training an pek thin thu  tarlangin Siaha district chhunga thalai tam zawkte tan an inhawng reng thu  a sawi a. Thalaite chu ram leh hnam innghahna ber an nih angin zu leh ruihhlo laka an fihlim a pawimawh hle a ti . Siaha district chu international border- a awm a nih angin dan lova thil lakluh  kawngah theihtawp an chhuah thin tih a tarlang a. Ramri venhim chauh an hna a nih loh thu sawiin ruihtheihthil a bik takin 'drugs'  lo lut tur lakah venhimna hna an thawk nasa hle tih a sawi.

Infiamma ngaina mi a nih thu sawiin Major Raj Kishor chuan infiamna hmanrua ( sport iltem) chi hrang hrangte chu a  mamawhtute hnenah an pe chhuak thin a ni, a ti a. Thalai tam tak ruihhlo laka an fihlim theihnan infiamna chawisan leh uar zawka kalpui a tul hle nia ahriat thu a sawi bawk . Assam Rifles- te chu mipuite tana thawk  annih thu tarlangin, NGO hrang hrang bakah sawrkar lama thuneitute nen thawhhona tha tak an nei tih a tarlang bawk. Thingtlang lama chengte tan 'Health camp' nei a an chhuah fo thin thu sawiin, hei hi thingtlang lama chengten an hlawkpui hle a ni,  a ti. Zirna chu thil pawimawh tak a ni tiin zirlaite tan theitawp an chhuah thin tih sawiin, tanpui an ngaihna kawngah an theih leh phak ang angin an puih thin thu a sawi bawk.

Major Raj Kishor chuan Mizoram Journalist Association, Siaha  hnathawh fakawm a tih thu tarlangin, mipuite hnena chanchinthar, Siaha chhunga thleng bakah Mizoram leh khawvelin thil thar a tawnte  puangdarhtu an ni tiin an hnathawh leh inpekna  a chhuanawm  hle a ni,  a ti .  MJA- te nena thawhhona tha tak  awm turin Assam Rifles- te an inhawng reng thu a tarlang  a.  MJA aiawh te pawhin Siaha distrcit tana Maj.  Raj Kishor hmalakna leh inpekna fakawm an tih thu tarlangin a hnathawh leh hmalakna  mipuite beng hriat leh hmuh theih a  thehdarh  zel an tum  thu an sawi a ni. MJA-te chuan  Assam Rifles - te nen thawhhona tha tak neih a pawimawh hle tih tarlangin, Siaha district- a lo ralmuang zelna tur leh  hmasawnna tha zawk awm tura  thawhho zel nise tiin Major Raj Kishor hnenah hian an thlen  a, chawhlui kilhona neih nghal a ni bawk.