561/2024-2025

Hnahthial the 25th May, 2024: Vawiin chawhnu dar 2:00 khan Pu Madhup Vyas (IAS) Chief Electoral Officer, Mizoram chuan Hnahthial a tlawh a, Hnahthial District Bawrhsap leh District Election Officer ni bawk Pu Chuauhnuna, Hnahthial SP Pu Shivendu Bhushan (IPS), Hnahthial DC Office-a Officer leh Police Officer ten lo dawngsawngin Pu Madhup Vyas, Chief Electoral Officer, chuan DC Office-a MP inthlanna hman Electronic Voting Machine (EVM) dahna Strong Room, MP inthlana Vote chhiarna tur DC Conference Hall-a Counting Hall siam te, CCTV te a enfiah hnuah DC Office Meeting Hall-ah Officers te hi a meeting pui a ni.

Meeting hi Pu Chuauhnuna District Election Officer  chuan a kaihruai a, Pu Madhup Vyas (IAS) Chief Electoral Officer, Mizoram chuan Mizoram-ah MLA leh MP inthlan a hmachhawn tawh a, inthlanna felfai leh thianghlim tak a awm thin chu lawmawm a tih thu te, Hnahthial District pawh MP inthlan felfai tak an hmachhawn hnua Vote chhiar tura an inbuatsaihna te chu tha thawkhat hle a a hriat thu a sawi a, Vote chhiar chu Election Commission of India (ECI) duh dan ang ngei a kalpui chhunzawm turin a chah nghal bawk a ni.

Pu Madhup Vyas, Chief Electoral Officer, hi zaninah Hnahthial-ah a riak ang a, naktuk zing dar 9:30 hian Hnahthial chhuahsanin Serchhip a pan leh dawn a ni.