2392/2023-2024

Khawzawl, 20th October 2023: Vawiin chawhnu dar 3 khan Mizoram Inthlanpui chuh tura hming pek luh hun chu a lo tawp ta a. Khawzawl District Administration hnuaia Assembly Constituency awmchhun Tuichangah chuan mi paliin inthlan chuh tur hian an hming an thehlut a ni.

Bialtu MLA ni lai Pu Tawnluia chuan October ni 18, 2023 khan nomination hi Returning Officer Pu K. Lalrohlua hmaah rinawmna thutiamin a thehlut a. Indian National Congress Candidate Pu C. Lalhriatpuia leh Zoram Peoples Movement Candidate Pu W. Chhuanawma te chuan nimin khan nomination hi file-in; vawiin lamah Independent ( Lalpa Chhiahhlawh Zoramthar) Candidate Pi Lalhmunsiami chuan nomination hi a thehlut ve bawk.

Nomination paper te hi naktuk October ni 21, chawhma dar 11:00 ah enfiah  tur a ni a. Inhnukdawk duh tan October ni 23, chawhnu dar 3:00 thleng hun hawn a ni. Candidate te nomination paper leh affidavit hi Know Your Candidate Mobile Application kaltlangin en theih reng a ni.