1899/2025-2026

Dated Aizawl, the 14th October, 2025: Vawiin khan Brig Pushpendar Sorayan, DIG, HQ 23 Sector Assam Rifles chuan Khatlaa an Headquarters hmun atangin Assam Rifles Civic Action Programme hnuaia October ni 15 atanga ni 21 inkara National Integration Tour-a kal turte a vai liam.

DIG Brig Pushpendar Sorayan chuan thu sawiin, he tour hi naupangte’n an hlawkpui ngei a beisei tih leh naupangte chu an hmun tlawhte leh an thil hmuhte atanga chin dan tha leh hmasawnna tur rawn hawn a, hmang chhunzawm tura a duh thu a sawi a. Zinpuitu turte pawh naupangte him tak leh hlim taka rawn hawnpui turin a chah a ni. Zin turte hi Assam Rifles lukhum a pe nghal bawk.

Vai liamna hun hi Children’s Home Superintendent Dr. Samuel-a chuan lawmthu sawiin a khar a. Govt. Mizo High School NCC Pipe Band-te’n rimawi an rem bawk a ni.

He tour-a kal turte hi Children’s Home, Zokhawsanga enkawl lai mek, kum 11 atanga kum 17 inkar mipa naupang 15 leh zinpuitu tur, Home-a thawktu 2 leh Assam Rifles mi 2, an vaiin mi 18 an ni a. He tour-in a tum chu Mizoram pawna hnam dangte, an hnam zia te, an hnam rohlu leh hmun hlui te hmuhpui a, an khawhawi tihzau a ni.

Naupangte hi a hnuaia hmunte tlawhpui an ni ang:

(i) Guwahati – Museum, Zoo & Biological Garden, Planetarium, Brahmaputra Cruise, Kaziranga National Park with Jeep Safari, Army Public School

(ii) Shillong – Dawki Falls, Elephant Falls, Assam Rifles Public School, Wards Lake, Laitlum Canyon.