Mizoram State Games-2019 lo awm tura 23-Champhai North A/C tana hmala tura din, 23-Champhai North Assembly Constituency Level Committee chu vawiin chawhnu khan an Chairman Dr ZR Thiamsanga, Vice Chairman, Health & Family Welfare Board leh bialtu MLA nibawk hovin Circuit House Conference Hall-ah an thukhawm.

Dr ZR Thiamsanga chuan Champhai North bial chu infiamna huanga theihna sang tak nei leh beiseiawm tak bial anih thu a sawi a. Mizoram State Games-2019 inpuahchahna kawnga hruaitute hmalakna fakin, an hmalakna reng rengte chu district leh constituency hmel lanna tur anih angin mipuite chu an theihna zawnah thlawp tlat turin a chah a.  Mizoram pum huap infiamna huanga inelna lian ber tura duan State Games a chet that chu Constituency hming chherna mai bakah nakin zela hmalak awlsam zawkna  siamtu ani thei a  ni, a ti bawk.

Committee chuan infiamna discipline hrang hrang 32 zinga medal la ngei thei tura beiseiawmte bial chhung khua leh veng hrang hrangahte ngawrh lehzuala zawn chhunzawm zel nise, medal la ngei thei tura beiseiawmte chauh intirh nise a ti a. November Ni  22, 2019 hian bial chhung huap Constituency Sports Meet buatsaih nise ti a rel niin, Athletics, Individual Games leh Indigenous Games hmangin Champhai Zotlang Sports Stadium leh New Champhai Sports Complex-ah te infiamna runpui neih hmasak phawt nise,   hemi atanga titha thlanchhuahte chu bial aiawh tura chhawpchhuaha, intuaihriamna hunte neihpui nise tih a ni bawk.

He hunah hian Pu Paul Zakhuma, Secretary hnen atangin report ngaihthlak anih hnuah Sub-Committee peng hrang hrang atangin report ngaihthlak a ni a. Bial Jersey atan a sen lar thlan niin, Senso tur sum intuak anih theihna tura hmachhawpte leh infiamna discipline hrang hranga hma la tura ruatte hnen atangin hnathawh tawh leh hmachhawpte ngaihthlak a ni bawk.