4120/2025-2026

Dated Aizawl, 22nd January 2026: Nizan khan Public Health Engineering Department changtu Minister Prof. Lalnilawma chuan, AMRUT 2.0 hnuaia thawh tur, mahni in leh kawtkaia kartluana chatlak lova tui herhhaw theihna tur '24X7 Pilot Project', Vaivakawn leh Chawnpui veng hmun thenkhata kalpui tur chu a hawng. Hawnna inkhawm hi Helen Lowry Auditorium, 7th Day Tlangah buatsaih niin Pi Zodingpuii, Secretary, PHED in a kaihruai a, Bialtu Minister Pu Lalnghinglova Hmar bakah Pu TBC Lalvenchhunga, Adviser to the Chief Minister (finance) leh Pu Lalmuanpuia Punte, Adviser to the Chief Minister (Political) ten PHE Minister hi tawiawmin, Local Council hruaitute leh mipui thahnem tak he hunah hian an tel bawk a ni.

PHE Minister chuan 24X7 tui herhhaw theihna tur project chu Mizoram tan mellung pawimawh tak a nih thu sawiin UD&PA kaltlanga MoHUA atanga hmuh a nih thu a sawi a. Cheng Vbc 5.24 seng a thawh tur niin, pilot project a nih angin chhungkua/In 300 a huam dawn a, smart meter vuah vek tur niin, project atan hian pipeline network thar hman a nih tur thu a sawi a, 'tuna a huam phak loh tan pawh ruahmanna siam lawk nghal a ni bawk dawn a ni' a ti. Hmasawnna hna thawh kawngah department ten harsatna hrang hrang an tawh thin thu sawiin, hna thawh nan in hmun leh ramte khawih chet a ngaih chang a awm fo thin avangin veng thenkhatah chuan veng neitute'n an rem tih loh thin thu te, forest leh environmental clearance kawnga harsatna awm thinte avangin hna thawh a harsat chang a tam thute a sawi a, chutiang a nih laia 24x7 Pilot Project kalpuina tura veng mipuite inpeknaah lawmthu sawiin theihtawp chhuahpui turin a sawm nghal bawk a, Aizawl mai ni lo khawpui dangte pawhin tui hnianghnar an neih theih nan Central Ministry lamah pawh khawpui dangte tan pawh project lian tham tak tak theh luh a nih thu a sawi bawk.

Minister chuan mipuite chu tui renchem nachang hre tura chahin khawpuia tui pipe tam tak chu, a lifetime kum 15 vel bawr ni thinte chu, tun dinhmunah kum 30 chuangte an nih tawh hlawm thu leh tui leak te awm thei reng a nih hlawm avangin sawrkarin tui leak reportna tur Tui leak App a siamte chu zir chianga, hmang tangkai deuh deuh turin a chah bawk a. Tanrual a pawimawhzia sawiin 'tui hnianghnar kan neih reng theihna turin infrastructure nei tha thei mah ila, kan tuihna ber a kangchat zel emaw a nih chuan awmzia a awm dawn lo va, chuvangin kan ven that a ngai a, department hrang hrangte pawhin hei hi kan veitlan a ngai a ni' tiin YMA  te nen pawh tui hna ven kawnga thawhhona tur thuthlung sign thar leh a nih tur thu a sawi bawk a ni.

Zanin hun hmannaah hian Bialtu Minister Pu Lalnghinglova Hmar; Adviser to CM pahnih, Pu TBC Lalvenchhunga leh Pu Lalmuanpuia Punte te bakah Pi Lalrinkimi Chawnpui Local Council Chairman; Pu H. Lalchawimawia, Vaivakawn Local Council Chairman leh Consumer aiawhin Pu RL Zidinga Vaivakawn ten thu an sawi bawk a. Er. Zodinthari, E-in-C, PHED hnen atangin 24X7 Pilot Project chungchang technical report ngaihthlak niin Er. Ngentluanga, Chief Engineer Zone 1, PHED chuan lawmthu sawiin hun hi a khar a ni.

24X7 Pilot Project Report-a tarlan tlangpuite:

- 24x7 water supply hna hi thla 4 atanga thla 6 chhunga zawh fel tum a ni.

- He 24x7 System ah hian IoT (Internet of Things) leh Scada Unit te integrate (hmankawp) tum a ni a. Tui Level monitor na tur ultrasonic level indicator te, automated valve leh flow meter te tuizemah install a ni anga, consumer 300 te hnenah smart water meter a thlawnin vuah sak theuh an ni dawn a, eng emaw zat connection pipe leh distribution network thar siam a ni dawn bawk a ni. 

- Mobile Phone-a message leh thla lakte inthawn dan ang deuhin he system hian hna a thawk dawn a, consumer water meter reading te, tui a dawn zat te, valve hawn leh khar te, tui zem a tui level leh  tuizem atanga tui chhuak zatte gate-way leh cloud storage hmangin communication, monitoring leh operation siam tum a ni bawk.

- Mobile apps leh cloud storage-te hmangin a enkawltu Engineer ten Control Room emaw, an smart phone atangin emaw tuizem a tui level te (real time monitoring), tuizem atanga tui chhuak zat te, valve hawn leh khar te, consumer-in tui an hman dan te, an meter readingte a hmuh vek theih dawn a, tin, signal-in a man that theih lohna hmuna smart meter-te hi hand held device kengin a bul hnaiah emaw signal a man phakna a kal chuan an meter reading a lak theih vek dawn bawk. 

- He apps atang hian consumer ten an tui hman tawh dan te, tui an hman tam lutuk chuan warning an hmuin an en thei dawn bawk a ni.

- He 24x7 System hian lang tlang, rintlak leh him tha, tui hnianghnar zawk consumer-te pek a tum a ni.