Mizoram-in 26th North East Games a thlenna tur hmun (Venue) hrang hrang a inbuatsaihna zawh fel thawhkhat a ni ta a. Tukin khan intihsiakna hmun tur te hi Venue Sub-Comiittee chuan Chairman Pu Lal Thanzara hovin an tlawh kual a. Intihsiakna tur hmun hrang hranga inbuatsaihna kalpui dan a hmunah an enfiah a ni. Venue hrang hrang dinhmun hetiang hi a ni :

Hawla Indoor Stadium -Judo leh Weightlifting intihsiakna hmun tur a ni a. Engkim peih fel a ni tawhin a hmunhma tihfai ngai lai te lo tifai turin PWD hotute hriattir nghal an ni a. Venue Sub-committee Chairman in a lo hriattir tawh angin a kawt zawl blacktop pawh lo zawh fel a ni tawh bawk.

3rd MAP Ground, Mualpui -Athletic intihsiakna hmun tur a ni a. A hmunhma peih fel vek a ni tawhin 3rd MAP Commandant leh a a hoten a tulna apiang ah hnathawktu te an lo puibawm a. State hrang hrang tan inthlakna room tur puan In te an lo siam sak fel vek tawh a ni.

Rajiv Gandhi Stadium, Mualpui -26th North East Games Opening leh Closing function neihna tur hmunpui ber a ni a. Hetah hian Football, Athletics leh Volleybal intihsiakna neih a ni ang a. A hawnna atana a hmunhma chei leh inbuatsaih tul ang te chu peih vek hman turin PWD hotu ten theihtawp an chhuah mek a ni.

Republic Veng Khelmual - Hockey competition neihna hmun tur a ni a. Road roller hmanga chul mam a ni tawh a. Intihsiak hun chhung zawng PWD hotu ten he khelmual hi road roller nen an vil dawn a ni. Chairman chuan official leh substitution awmna tur Field sirah siam turin tukin ah chuan a hriattir.

Sipai Lammual - Football competition neihna tur hmun a ni a. Pavillion chung khuh mek chu vawiin ah zawh hman beisei a ni a. A hnuaia inthlakna room chu duhthu sama peih hman a nih dawn loh avangin a chhuatah jute carpet phah tur a tih a ni.

Heng intihsiakna tur Hmun hrang hrang ah te inbuatsaihna peih fel thawkhat a ni tawhin North East Games tha taka Mizoram in a thleng thei tur hi Venus Sub-committee Chairman chuan lawmawm a ti hle a ni.