Mizorama zu khapburna dan hman mek Mizoram Liqour Total Prohibition Act, 1995 zirchiang tura din Study Group te chuan kum khat chuan an zirchian hnuin an thil hmuh leh ngaihdan zirchianna chu vawiin khan Excise and Narcotics Minister Pu JH Rothuama hnenah an thehlut ta.

MLTP Act Study Group te hi Pu H Raltawna, IAS (Rtd) Chairman na hnuaiah member 18 neiin January 2011 khan din a ni a. Meeting vawi 5 thu in MJA President Pu H. Zosangliana kaihhruaina hnuaiah Sub Group an din bakah Mizoram University Psychology Department mi thiam ten he Act hlawhtlin leh hlawhtlin loh chungchang zirbingna an nei bawk. MLTP Act, 1995 hi dan tha tak, a hremna pawh tha tawk niin Study Group chuan a ngai a. Amaherawhchu zu khap rem tumna leh a kaihhnawih sualna tibo tur erawh chuan a hlawhtling lo a ni, an ti a. Health Department record atanga a lan danin he Act hman hnuah zu avanga thin tha lo an pung zel a, zu ngawl vei pawh an pung zel tho bawk. MZU zirbingna in a tarlan danin mipui leh tlawmngai pawl zingah hlawhtlinglo titu an tam zawk nain hlih duh erawh an tlem zawk a; zu hian Mizo khawtlang nun, chhungkua leh mimal nun a tihbuai mai bakah zu in mi leh zu ngawlvei chhungkaw zingah beidawnna leh rilru hah vawr tawp (depression leh stress) nei an tam bik hle tih hmuhchhuah a ni.

Zu khap burna dan hi hman zel a nih dawn chuan Excise &Narcotics Department tih chak a, tlawmngai pawl te tih phur reng a tul a, MLTP Act hi tlem a zawng siam that ngai lai a awm bawk tiin Study Group chuan an ngaihdan leh hmuh dan te sorkar hnenah an thlen a ni.