Mizoram Rasthtriya Madhyamik Shiksha Abhiyan (RMSA) hmalakna kal zelah Governement Secondary School leh RMSA school thara Zirlaite tan Mizoram pawnah study tour neih a ni ta a. Tukin zing dar 6:30 khan Parliamentary Secretary Pu Chawngtinthanga’n Aizawl District-a School hrang hrang zirlaite Millenium Centre kawt atangin a vailiam.

Pu Chawngtinthanga chuan zirlai zinchhuak turte chu an vanneihzia hre turin a chah a, mihring damchhung hian inzir reng a tul a ni tih sawiin zirlaite chu an zinna atanga an thil hriatte tha taka vawnga a taka hmang thei turin a chah a, tluang taka zina hlawhtling taka Aizawl lo thleng leh turin duhsakna a hlan bawk.

Aizawl District atang hian Government High School leh RMSA School zirlai 162 Mizoram pawnah tirhchhuah tur an ni a, tun tumah hian zirlai hmeichhia 33 leh mipa 66 an vaiin 99 Bus pathumin an kal a. Silchar-a hmun pawimawh Panchgram Paper mill te, tea estate te, Brick industry leh hmun pawimawh dangte an tlawh dawn a, Pu Lalhlimpuia Khiangte Dy DPC, RMSA in a hruai a ni.

Kumin hian Mizoram puma High School naupang 500 chuang zinchhuah tir tum an ni a, District hrang hranga zirlai naupangte chu an zinchhuah dan tur buaipui mek an ni a. District thenkhat chuan zirlaite hi an zinpui nual tawh a ni. Mizoram pawn bakah zirlai nawlpuite chu Mizoram chhunga hmun hla vak lo tlawh tura an fehchhuahna tur siamsak an ni bawk.

Zirlai excursion bakah hian RMSA hmalaknain Govt. Secondary School leh RMSA School thar, kumin atanga class tan zirtirtute tan study tour hi neih mek zel a ni bawk a. Zirtirtu thahnem tak Kolkatta-ah zinchhuahtir an ni tawh a. Hei hi zirtirtute intuaihriam zel nan leh an khawhawi a zau zawk theih nana ruahman a ni.