Vawiin khan Govt. J. Buana College Hall-ah ‘27th Annual Training of Registration of Births and Deaths Lunglei District neih tan a ni.

Training hawnna inkhawm DRO Lunglei Pu F.Lalzarmawia kaihhruaiah Pu Lalrikhuma, Jt. Director, Economics & Statistics Department Aizawl chuan thu sawiin Registration of Births and Deaths (RBD) hi India Sorkar-in a ngai pawimawh hle a, kum 1969 atangin hman tan a nih thu leh Mizoram-ah chuan 1985 atanga hman tan lo nih ve thu a tarlang. India ramah RBD-ah hian Mizoram hi ti tha ber pawl a ni a, zaa za tlin hrih lo mah ila Registrar-te taimakna zarah reilote ah tlin theih beisei a ni, a ti. RBD hi ram leh hnam humhalh nan a pawimawh a, Birth Certificate tel lovin EPIC leh Electoral roll-a in thun pawh a theih loh a ni a, chuvangin khua leh tui dik tak tan chuan RBD hi ngaih pawimawh theuh a pawimawh hle a ni, a ti. Ram pawn mi (foreigner) te chu RBD Certificate pek hi danin a phal loh avangin fimkhur a ngai hle a ni tih Registrar te a hrilh bawk a ni.

RBD Training-ah hian Pu Lalngaihmawia Jote, 1st Class Magistrate, Lunglei Court pawhin thu sawiin RBD leh Court ten inlaichinna thuk tak an nei a; kum 1969 atang daih tawhin ‘Registrar of Birth and Deaths Act’ hi hman tan a lo nih tawh thu a sawi a ni. Registrar of Birth & Deaths data lakkhawm mila ram kalphung leh sum leh pai chet dan tur (economic planning) siam thin a nih avangin thawktute pawhin felfai tak leh dik taka an thawh a pawimawh a ni tiin a chah.

Pu Thanglura, Research Officer, Economics & Statistic, Aizawl leh Pi Lalthankhumi Chhakchhuak, SIS, Lunglei ten Registrar kalkhawmte chu training an pe a ni.