Vawiin khan Kolasib DC Conference Hall-ah NLUP Implementing Board Chairman Pu J.H. Rothuama hovin NLUP chungchang meeting pawimawh tak neih a ni a. He hun hi Kolasib DC Pu Jitender Yadav, IAS chuan kaihruaiin Kolasib District chhunga NLUP hmalak dan Line Department hrang hrangten an sawi a ni.

Pu J.H. Rothuama chuan thu sawiin NLUP hi sawrkar flagship programme a niin sawrkar chuan hemi hmanga Mizoram economic siam that tumin nasa takin a bei a. Ram vah chereu avangte, eizawnna mumal neilova mi tamtak vahvaihna te laka chhanchhuak tura Scheme tha tak, state dang leh ram dangah pawha anla tih ngailoh a ni a. Hei kan dinchhuahpui ngei tur a ni, a ti a. Hlawhtlinna tamtak kan hmuh chhoh mek lai hian Department tinten kan hnuaia Beneficiary te tun ai hian vil uluk lehzual ila. Tun kumtharah hi chuan Zopa tlawmngaihna hmanginkanhnuaia trade thlangtute tha tharin vil ila, farmer ten- en pawh i inpawh lehzual ang u, Pu Rothuama chuan a ti a ni. Mizote hi lehkhathiam tamna ram ni mahse kut hnathawh kan uar lova, kan thatchhiat vang pawh nilovin ; heti lamah hian a thara kan thanharh a ngai a ni, a ti a. Kolasib leh Mamit District bik kan en chuan eng thlai leh buh pawh that duhna hmun, phun apiangin a ngeih thin na hmun a ni, a ti a. Heti a nih avang hian nasa lehzuala tan kan lak chuan dinchhuahpuina tham kan thar ngei ang tiin, a viltu Deptt. ten uluk lehzual ni rawh se, Pu J.H. Rothuama chuan a ti a ni.

Meeting-ah hian Line Department tinten an thawh dan report an pek bakah an harsatnate an sawi a. Department te hian an hnuaia trade thlangtu zinga pawisa pek chhunzawm tlakloh nia an ngaihte pawh an tarlang a. Deptt. thenkhat chuan rawtna tepawh ansiambawk a ni.

NLUP monitoring alo that zawk nan tun hmaa Monitoring Committee MLA hova din pawh DC chairmanna hnuaia dah a, Committee pahnih chu pakhata chhunfin a ni tawh tih meeting-ah hian sawilan a ni bawk a ni.

Pu Zorammuana, Secretary, NLUP Implementing Board leh Pu David L. Thangliana, MIS, Chief Media Officer ten NLUP chairman hi an tawiawm a ni.