Tukin zing kar khan DM&R Minister Pu C. Ngunlianchunga leh sawrkar mi pawimawh ten Ramhlun Sports Complex thlanga leimin in in hmun hma a tihchhiat tak te, lei khi mek te leh in leh lo chan ta te awmna tura sawrkarin in a sakna hmun tur te chipchiar takin a fang.
Minister leh amah tawiawmtu Planning Board Member Secretary Pu P.L. Thanga, DM & R Principal Secretary Pu P.C. Lallawmsanga bakah Department hrang hrang hotute leh Aizawl Bawrhsap Dr. Franklin Laltinkhuma te chu Ramhlun Veng Local Council hruaitute leh veng chhung pawl hrang hrang hruaitu ten an lo dawngsawng a ni.
Heng Veng chhung hmun hrang hrang a leimin leh lei tawlh in thil a tihchhiat dan te, leimin hlauhawm zui theih dan te, leimin tuar avanga in leh lo chante tana hmun pek buatsaih mek dan te lo hrilh in a panna pangngai tur buatsaih dan te pawh thlir hovin sawiho zui nghal a ni.
Minister chuan heng harsatna hrang hrang te hi sawrkarin a hriat thu leh chak taka a bawhzui dan te sawiin fur tui thlak hma ngei a, hna zual pui peihfel hman a duh thu te, a panna kawngpui siam leh mual tawlh tur danna siam te, in leh lo chante tana insak hna te pawh a ruala thawh chhunzawm reng a beisei dan te khawtlang hruaitute chu a hrilh a ni.
