Tukin zingkarah khan Transport Minister Pu John Rotluangliana chuan Transport Department building thar tualah ‘27^th Road Safety Week’ a hawng a. Hemi rual hian vawiin atanga hman tan tur, ‘Motor Vehicle Tax’ leh ‘Passengers & Goods Tax’ rate thar a tlangzarh nghal bawk.

27^th Road Safety Week hawn paha thu sawiin Minister chuan, Kumin Road Safety Week-in a tum ber chu ‘Lirthei accident laka kan fihlim theih nan a takin hma I la ang u’ tih a ni a, chumi ti hlawhtling tur chuan lirthei khalhtute leh lirthei neitute thawh hona tha tak neih a tul a ni, a ti a. Pu John Rotluangliana chuan lirthei khalhtute ngaihtuahna la peng thei thil, zu leh ruihtheih thil chihrang hrangte, music ring lutuk leh earphone ngaihthlakte hi accident thlen tirtu tam ber an nih thu tarlangin, passenger-te leh lirthei neitute pawhin an lirthei chuanna tur leh a khaltute hetiang kawnga an fihlim theihnan fimkhur turin a chah a. Lirthei khalhtute chu midang ngaichang chunga lirthei khal thin tura chahin, traffic rules kan zawm that vek chuan lirthei chetsualna tam tak kan pumpelh thei a ni, a ti a. Lirthei tlan muang lutuk chuan a hnung lamah traffic jam a siam thei tih sawiin lirthei khaltute chu an hma a mite umphak tawk tala tlan chak thin turin a chah a. Kawngpuia intlansiak leh mahni thunun theihloh khawpa lirthei khalh chak erawhchu dan kalh a nih thu a sawi bawk. Minister chuan mipuite pawh lirthei leh traffic rules ngai pawimawh tura chahin kawng kanna tur hmun ruat bikah chauh, lirthei che vel ngaichang chunga kawngkan thin tur in a ngen a ni.

He hunah hian Minister chuan Motor Vehicle Tax leh Passengers & Goods Tax rate thar a tlangzarh nghal a. Heng chhiahte hi mipuiten internet kaltlangin an pe thei tawh dawn tih a tarlang bawk. Tlangzarh ruala thu sawiin Minister chuan Mizoram sawrkarin tuna lirthei atanga chhiah lak tur rate thar a tih chhuah hi Central Sawrkara Transport Development Council Meeting-in a lo rel tawh bawhzuina a nih thu a tarlang a. Central sawrkar chuan State sawrkar tinte chu a tlem berah 6% life-time tax la turin a hriattir tawh tih sawiin Minister chuan Mizoramah chuan mipuite hmakhua ngaiin Central sawrkar phal china a hniam thei ang ber, 6% kan hmang dawn a ni, a ti. He dan hnuaiah hian private motor zawng zawng te, autorickshaw, taxi leh maxicab-te chuan life time tax (kum 15 atan), motor man (VAT chhut hma) atanga 6% an pek vek a ngai tawh dawn a ni. Motor register sa, life-time tax pe tawhte chuan an lirthei upat dan a zirin an tax pek tawh atanga rate bithliah sa an pek tel a ngai bawk. Passengers and Goods Tax pawh kum 25 aia rei rate ngai hman a nih hnuin February ni 8, 2016 atanga hman tan tur in rate thar siam a ni bawk.

Road Safety Week hawnna inkhawm hi Transport Department Secretary, Pu Hrangtawna, IRTS-in a kaihruai a. Transport Department Director leh Aizawl Traffic SP leh department pahniha staff-te bakah ZDU aiawhte an tel kim hle a ni.