District Road Safety Committee, Serchhip huaihawtin vawiin chawhma dar 11:00 khan Serchhip DC Office tualzawlah kar khat (8^th February, 2016 - 15^th February, 2016) awh tur "27^th Road Safety Week, 2016" hawnna inkhawm buatsaih a ni a, District Bawrhsap, Dr. Lalrozama, IAS chuan khuallian niin he Hapta hi a hawng a ni.

Hawnna thusawiin District Bawrhsap chuan motor accident in kawng tam takin kan nunphung min nghawng a, hei vang hian Sawrkar in motor neitu leh enkawltute bakah mipuite hnenah fimkhur a tul zia inhrilh thar pawimawh a ti a; hemi atana hmalakna pawimawh tak Road Safety Week hi kum tin rampum huap a hman thin a ni a ti a, Mizorama Motor accident chungchang zir chiang tura hotuten an ruat avanga amah ngei pawhin theihtawp chhuaha a lo beih ve tawh thu sawiin motor accident chhan tam ber pakhat chu fimkhur loh vang leh hmangchang hriat loh vang a ni a ti a, Motor neitu/Driver tam tak chuan an motor vawn lai chanchin an hre bel tawk lo thin a, hei hian harsatna tam tak a thlen thin a ni a ti bawk.

27^th Road Safety Week, 2016 hi tun thla ni 15 thleng hman tur niin thupui atan "Accident laka kan fihlim theih nan a takin hma i la ang u" tih chu hman a ni a, February ni 11, 2016 hian Serchhip-a Maxicab, Taxi leh Auto-Rickshaw khalhtute tan training buatsaih a ni ang.

Vawiin Road Safety Week hawnna inkhawm hi Pu Sanghnuna Pachuau, DTO, Serchhip-in a kaihruai a, Serchhip khawpui chhunga Sawrkar Department hrang hrang hotute, Zoram Drivers' Union Sub. Hqrs. Serchhip aiawhte, Passenger phur motor Association hrang hrang hotute bakah Serchhip District MJA member te an tel a ni.