Lunglei DC Pu Abhijit Vijay Chaudhari, IAS chuan vawiin khan Lunglei District chhunga chanchinbumi leh media dangte chu ama pisaah kokhawmin inhmelhriatna hun leh infuihna hun an hmang ho.

Vawiin Press Meet-ah hian DC Pu Abhijit Chaudhari chuan mipui rorelna ram (democracy) ah media pawimawhna tarlangin Lunglei District chhunga media hrang hrangte chu District hotute nen inpawh taka thawhho a duh thu a sawi a; sorkar hmalakna hrang hrangah tan lakpui tur leh sorkar atanga mipuite tana hriattur pawimawh thuchhuahte chu taima taka chhuah sak zel turin a chah. February ni 10, 2016 atanga Mizoram puma 'Fire Prevention Week' hman tan turah media-te chu theihtawp chhuahpui tura sawmin Pu Abhijit Chaudhari chuan kangmei chhuak tur dona kawngah Lunglei District chu titha ber kan nih theih nan sorkar, NGO, media leh mipui zawng zawng i tangrual ang u, a ti.

MJA Lunglei President Pu Lianchama Chhangte leh MJA member dangte pawhin thusawiin an thil ngaih pawimawh hrang hrang DC hnenah an thlen chu Pu Abhijit Chaudhari chuan theihtawp a lo chhuahpui tur thu a hrilh bawk. Vawiin Press Meet-ah hian Lunglei bakah Hnahthial atangin chanchinbumite an kalkhawm tha hle a ni.