2309/2023-2024

Hnahthial the 13^th October 2023: Vawiin khan 29-South Tuipui Assembly Constituency Expenditure Observer Pu Bal Kishan Gopal chuan DC Conference hall, Hnahthial-ah Election Expenditure Monitoring (EEM) team te a kawm.

Expenditure Observer Pu Bal Kishan Gopal chuan Election Expenditure Monitoring (EEM) team din chhan chu inthlanpui felfai leh thianghlim tak neih a ni a ti a, chutiang tur tak chuan theihtawp an chhuah dawn tih a tarlang. EEM team te chu hrilhfiah ngai emaw hriatthiamloh an neih te chu hreh lova zawt thin tura chahin amah ngei pawhin zir tur tam tak a neih thu a sawi a, engkimah inrawn tawnin theihtawp chhuah tlang turin team te a sawm a ni. Mizoram chu ram ralmuang tak a nih thu tarlangin beiseina sang tak a neih thu a sawi a, buaina lian tham awm lova inthlanpui felfai tak an neih theih ngei a rin thu sawiin thahnem ngai taka an hna theuh thawk turin a chah a ni.

District Election Officer, District Bawrhsap Pu Chuauhnuna pawhin thu sawiin Expenditure Observer chu Mizoramah leh a bikin Hnahthial-ah a lo lawm thu a sawi a, EEM team hrang hrangte a ring tawk hle tiin inthlanpui thianghlim tak nei turin mitinin theihtawp an chhuah dawn thu a hrilh a, a cham chhungin hun hlimawm leh tha tak hmang turin duhsakna a hlan nghal a ni.

Vawiin Expenditure Observer hova meeting-ah hian District Bawrhsap Pu Chuauhnuna bakah South Tuipui AC RO, Addl. DC ni bawk Pu Lalvenhima, ARO leh SDO (S) Pu Neng Thianlala, Election Officer Pu Lalbiakfela, SDC Pi Betty Lalrinfeli leh Election Expenditure Team hrang hrang, Flying Squad, Video Surveillance Team, Static Surveillance Team, Video Viewing Team leh Accounting Team te leh Assistant Expenditure Observer te an tel a ni.