Vantlang intawm tur thlanmual din dan tur ngaihtuahtu Consultative Sub-Committee for Common Cemetery chu vawiin khan Pu R.L. Rinawma, IRS, Principal Secretary to Govt of Mizoram, UD&PA Department changtu kaihhruaina hnuaiah an thukhawm.

Pu R.L. Rinawma chuan member te hnenah chuan Aizawl khawpui thang lian zelah vantlang intawm tur thlanmual hmunhma remchang dap a tul thu an sawi a, ram remchang tur laite a awm chuan sorkarah rawtnate thlen a tul thu a sawi a. Khawpui thanglian zelah hian nakin lawkah chuan veng bila thlanmual neih hi thil buaithlak tak a la nih theih dawn avangin kum 50 atanga kum 100 hmathlir neia tun atanga ruahmanna siam a tul thu a sawi a ni. Aizawl khawpui mai bakah district headquarters leh khaw lian deuhte chuan thlanmual intawm tur hmun neih dan hi ngaihtuahnaah an neih a tul tawh thu an sawi a ni. Consultative Sub-Committee hian vantlang intawm thlanmual a awm huna mumal zawka inrelbawl a nih theih nana dan hman tur a ruahman chin chu an thlir ho a, siamthat ngai laite siamthain rawtna chu sawrkara thlen nise tiin an rel.

Consultative Sub-Committee for Common Cemetery-ah hian Sorkar Department hrang hrang bakah CYMA, MUP leh MHIP aiawhte an tel a ni.