“Ruihhlo-in chhungkaw tamtak min luhchilh mek a, la him a inngai tamtak kawngka bulah an ding mek a, khawlaiah a vak ruai reng bawk a ni tih hriain kan puan ven i sawi chhing ang u.” He thu hi Pu Lalthanliana, Social Welfare Minister-in vawiin khan International Day Against Drug Abuse and Illicit Trafficking denchhena inkhawm buatsaih Synod Conference Centre-a neihah a sawi.

Minister chuan Mizoram tluka tlawmngai pawl tha awmna a awm lova tiin kohhran leh tlawmngai pawl hrang hrangten sorkar hmalakna ruihhlo do kawngah an lo tawiawm thin avangin lawmthu a sawi a. Vawiin khawvel puma ruihhlo hman sual leh tawlh ruk dona ni-ah hian kan rama ruihhlo kaihhnawih harsatna punlun mek zel hi theihtawpa do zel turin mipui zawng zawng Minister chuan a ngen a. Naupangte leh thalaiten ruihhlo hman sual that lohzia leh a nghawng tha lo te an lo hriata inven nachang an lo hriat theihna turin ngaihtuahna, tha leh zung hmang turin kalkhawmte chu Pu Lalthanliana hian a chah bawk a ni.

Pu K.Lalrinthanga, Parliamentary Secretary pawhin he hun hi hmanpuiin eizawnnaah kan fimkhur a ngaih tawh thu sawiin phai lama kan zirlaite pawh an fimkhur a ngai a, mi buma awm lo tura inveng thiam turin a fuih. Inkhawm hi Pu Lalrinliana Fanai, IAS Commissioner & Secretary, SWD-in a kaihruai a. Pu Lalhmunsanga, Commissioner, Excise & Narcotics Department chuan ruihhlo tawlhruk dan hrang hrang sawiin mitin kan tan ho a tul thu a sawi. He ni denchhena Essay Competition buatsaih lawmman semna hun hman a ni bawk.

He ni paula inkhawm hi Mizoram sawrkar department hrang hrang Assam Rifles leh tlawmngai pawl engemaw zat tan a buatsaih a ni.