International Trade Expo vawi 2 na tur chu vawiin chawhnu khan Aizawl Sipai Lammual-ah Mizoram Larsap Pu Vakkom Purushothaman chuan a hawng.

Expo hawnna thuchah a sawi ah Governor chuan ram chhung leh thenawm ram thenkhat te pawhin India hmarchhak state te hi ram buai, hel pawl chet hluarna niin an ngai thin a. Hei hi thu dik ziktluak a ni lova a bikin Mizoram ah phei chuan inremna thuthlung ngialnghet leh state dangte tana entawn tlak a mi cheng ten vawiin ni thlen in an vawn nung reng a ni a ti a, hmarchhak state zawng zawng chutiang chet hluarna a ni bik lo a ti. International Trade Expo huaihawttu North East Trade Expo leh Mizoram sorkar Industries Department te chungah lawmthu hrilh in kawvel ram dang thenkhat leh state hrang hrang sumdawng mi leh company lian ten an thil neih phochhuahna hun hi thil tangkai tak a nih ngei a rin thu a sawi a.Hetiang intawhkhawmna atang hian sumdawng mi leh mipui mimir in chinchang tangkai tam tak an chhar chhuah phah thin a ram pum leh state sum pai dinhmun chawikangtir thei hmanraw tangkai a tling thin a ni a ti.

Mizoram pawn atanga lo kal zawng zawng te chu an cham chhunga hun nuam tak an neih a duhsakna hlanin hun an neih phawt chuan Aizawl dai hnai mai a awm Zokhua Reiek te, Hmuifang Tourist Resort te tlawh turin a sawm a ni.

Internation Trade Expo ah hian ram pawn atangin Egypt, Ghana, Nepal, Thailand, Bangladesh leh South Africa te atangin an lo tel a. He Expo hi May 31 thleng a awh ang.