1085/2022-2023
Aizawl, 29th June, 2022 ; Mizoram Finance Commission Pahnihna (2nd Mizoram Finance Commission) chuan an Chairman Pu F. Vanlalruata hovin vawiin khan Saitual District an tlawh. Finance Commission hian Saitual District Village Council Association hruaitute, Saitual Town chhunga Village Council aiawhte, Project Director, District Rural Development Agency, District Urban Development Officer leh District Local Administration Officer te nen vawiin chawhma dar 11.30 khan DC Conference Hall ah District Level Consultative Meeting an nei a ni.

He meeting hi District Bawrhsap Pu V.L. Hruaizela Khiangte in a kaihruai a. Pu F. Vanlalruata, Chairman, 2nd Mizoram Finance Commission chuan tualchhung sawrkar (local self government) lo indin chhoh dan leh 73rd leh 74th Constitution Amendment Act te’n tualchhung sawrkar te hnena thuneihna tam zawk a pek dan leh sum leh pai an chan tur State Finance Commission kaltlanga ruahmanna siam a nih dan te a sawifiah a.

Pu Lalmalsawma, Member Secretary, 2nd Mizoram Finance Commission in he Commission hna thawh tura Sawrkar in ruahmanna a siam “Terms of Reference” chungchang kalkhawm te a hrilhfiah a.

Village Council te hnena Central leh State sawrkar atanga sum leh pai hlanchhawn (devolved) anih dan leh VC te’n anmahni a sum hnar hrang hrang an neih te powerpoint presentation hmangin Pu Lalrohlua, Deputy Secretary in kalkhawm te a hrilhfiah chhunzawm bawk.

District Level Consultative Meeting ah hian Village Council te’n an khaw hmasawnna leh inrelbawlna atana an hman thin Village Council Fund tih pun zel anih theih dan tur zau taka sawiho a ni.

He meeting zawh hian Mizoram Finance Commission Pakhatna atanga Village Council ten grants an hmuh hmanga an hnathawh thenkhat te endik zui ani bawk.