Vawiin khan Social Welfare buatsaihin Economics & Statistics Conference Hall-ah ‘2nd Phase Training of District Level Master Trainers (DLMTs) on Implementation of Annual Contextualised ECCE Curriculum’ neih tan a ni a, he training hi ni thum (9-10 & 12 January, 2019) chhung neih a ni ang.

District Level Master Trainers Training hawnna inkhawmah Social Welfare Department Director Pi Laldikkimi chuan thuhmahruai a sawi a, training an buatsaih chhante sawiin kumtharah department hnuaia thawk zawng zawngten nasa lehzuala tan la theuh turin kalkhawmte a fuih. SWD Secretary Pu K.Vanlalrawni chuan Training hawngin Mizoram State mila siam ‘Theme-based Contextualised ECCE Curriculum’ chu siam a lo ni tawh a, he Curriculum hi Mizo hnam zerang mi tura siam niin Mizo thawnthu leh hlate pawh tam tak telh a ni, a ti. He Curriculum hmang thiam tur hian Child Development Project Officer (CDPO) te, Circle Officer (CO) te leh Anganwadi Worker te pawh ECCE training thawh khatna (Phase-I) chu 2016 khan neihpui a lo ni tawh bawk tih a sawi a. CDPO leh CO te hian state chhunga training an dawn mai bakah National Institute of Public Cooperation & Child Development (NIPCCD), Guwahati-ah te pawh ECCE training neihpui an ni tih a sawi bawk.

Naupang kum 6 hnuailamte hnena kawng tinrenga hmasawnna (all round development) thlen hi ICDS thiltum bulpui ber a ni a. Chawtha pek te, hriselna tha an neih nana hridanna pek te, nu naupai leh naupawm te hnenah zirtirna pek te, khawtlang nena thawhhona te leh naupang kum 3-6 inkarte hnena ‘Non-formal Pre-school Education/Early Childhood Care and Education’ pek te hi ICDS hnatahwh lian ber an ni.

Early Childhood Care & Edcation (ECCE) hi ICDS hnathawh pawimawh ber zinga mi a ni a, kum 2012-a ICDS Scheme tihchaka thuamthat a nih pawh khan Anganwadi Centre-a ECCE kalpui dan nasa taka tihchangtlun a ni. National ECCE Policy duan a ni a - naupang taksa tan mai ni lo, a rilru leh thluak tana hmasawnna a dawn vekna tur hi he policy thiltum a ni. Anganwadi Centre-te hi ‘Vibrant ECCED Centre’ a siam a, naupangte taksa, rilru leh thluak hmasawnna tura inenkawlna ‘outpost’ hmasa bera siam hi he policy tum bulpui ber a ni. Hemi tihhlawhtlin nan hian Mizoramah pawh nasa takin hmalak a lo ni tawh thin. Pre-School Education Kit te, Medicine Kit te Anganwadi Centre tinah kumtin a thara pek thin an ni a, Anganwadi Centre hmasawnna turin kawng tam takin hna thawh a ni.

Tunah hian training thawh hnihna ‘2nd Phase Training of District Level Master Trainers (DLMTs) on Implementation of Annual Contextualised ECCE Curriculum’ chu kalpui mek a ni. CDPO leh CO tan training hi Aizawl leh Lunglei-ah neih a ni dawn a, training an zawh hnuah Mizoram puma Anganwadi Worker-te an train ve lehchhawng dawn a ni.