Sorkar laipuiin rampuma sikul zirlai Science lama tui leh talent nei thate tana inelna a buatsaih INSPIRE AWARD chu kuminah pawh neih a ni leh dawn a. Vawiin khan he Inspire Award 2012 hnuaia 2nd State Level Exhibiton-cum-Project Competition chu St. Paul’s Higher Secondary School, Tlangnuam-ah Education Minister Pu Lalsawta’n a hawng.

Inspire Award 2012 hawnna inkhawm SCERT Jt.Director Pi Sangthanmawii kaihhruaiah Education Minister Pu Lalsawta chuan Mizorama zirna kalphung thlak danglam a tulna hriain sorkar chuan theihtawp a chhuah mek zel a, subject har tak anga ngaih thin Mathematics leh Science te pawh zirlaiten an ngainat thar leh zir zel chakna an neih theih nan tan lak a pawimawh hle a ni, a ti. Tun dinhmunah Eployment Exchange-ah mi 40,000 chuang an in-register tawh tih sawiin Minister chuan tunlai khawvelah certificate neih ringawt chu a tawk tawh lova, hna thiam nih a tul tel tawh avangin Mizo zirlaite chu chutiang mi hmantlak ni tura chherchhuah chukantum ber a ni, a ti bawk. Mizo thalaite chu khawvel hmun dang thalaite aia nep bik emaw hnuaihnung bikna an nei lova, Internet hmangin khawvel chanchin leh thil thar ber ber te pawh an ban phakah a awm vek tawh avangin zirna kalphung pawhin hmalam a sawn zel a ni, a ti.

SCERT Dy. Director (SPW) Pu R.S.Chauhan chuan Inspire Award tobul sawizauin Ministry of Science & Technology-in rampuma khaw hrang hrang leh hmun kilkhawr zawka cheng zirlai Science lama talent nei tha tak tak te haichhuah nan a ruahman a nih thu a sawi a. Inspire Award inelnaa zirlai tel zawng zawngte chuan Rs.5,000/- an dawng theuh a, heta ti tha zualte chu National Level inelnaah an thawn leh thin thu a sawi bawk a. 12th Five Year Plan hman a nih atang phei chuan school tin atangin zirlai 4 an tel thei tawh dawn nghe nghe a ni. Mizoramah school 1891 a awm a, heng school tin ten zirlai 4 theuh an thawh chuan kumtin Inspire Award atan sorkar laipui chuan cheng  nuai 94.55 a pe dawn a ni. Tun dinhmunah Mizoram bikah chuan 11th Five Year Plan hnuaiah Inspire Award-a tel Class 6-10 zirlai zawng zawngte hnenah belhkhawmin cheng nuai 120.35 sem a ni tawh a, District hrang hrang atangin an tel dan chu hetiang hi a ni:

Vawiina hawn tak Inspire Award 2012-ah hian zirlai 34 an tel a. Jury atan Prof.Lalnundanga, Dept. of Forestry, MZU; Prof.S.K.Mehta, Dept. of Botany, MZU leh Pu Lalrinthara Pachuau, Asst Prof., Physics, PUC te an ni. Inspire Award hawnna inkhawm-ah hian School Education Director Pu P.Lalchhuanga leh MBSE Chairman Rev. Dr. Lalchungnunga te pawh an tel a ni.