Mizoram University Vice Chancellor Prof R.Lalthantluanga chuan vawiin khan Chief Minister Pu Lal Thanhawla chu a office ah hmuin, inkawmna hun tha tak an nei.
Prof R.Lalthantluanga chuan kawng hrang hranga University in hma a sawn dan te Chief Minister hi hrilhin, academic building thenkhat luah theih maia peih tawhte chu hun remchangah hawng turin a sawm a. Hengte bakah hian University in hun pawimawh leh seminar buatsaih an tum chungchangah Chief Minister chu tel ve ngei turin Vice Chancellor hian a sawm bawk a ni.
Chief Minister Pu Lal Thanhawla chuan Vice Chancellor sawmna te chu lawmawm a tih thu hrilhin, tih puitlin sak ngei a tum thu a hrilh bawk a. Chief Minister chuan University panna kawngpui zauh hna thawk tura GT Projects Ltd. pek a nih tawh thu VC chu hrilhin, ruahsur han veleh tan theih a beiseiawm a ni a ti a. Black Topping turah pawh tender koh mek anih thu hrilhin, ni 28 September 2012 ah tender chu hawn a ni ang a ti.
Chief Minister chuan tunhnaia under graduate result tihchhuah chungchanga felhlel awm, endik tura inquiry din kha eng dinhmunah nge a awm tawh tih chungchangte zawtin, BCA result tihchhuah tlai thu-a higher study zir duh tana harsatna awm theite engtianga chinfel tur nge tih te leh Registrar puitling (regular) nei tura hmalaknate Chief Minister hian VC chu a sawipui bawk a.Chief Minister chuan mawhphurhna kengkawhtu te intuaithar tul a tihpui thu te VC chu sawipui bawkin, hnathawktute hi mawhphurhna la ngama, insawifiah thei tura siam tul a tih thute a sawipui bawk a ni.
