532/2026-2027

Aizawl, 14.05.2026: MSACS leh SCERT tangkawpin Aizawl-a Private School zirtirtute puala School-a hriselna lam hawi zirtirna training “School Health Module” chungchanga ni thum awh training (May ni 12 a tan) a buatsaih, SCERT Auditorium, Aizawl a neih chu vawiin khan a kharna hun neih a ni. 

National Health Mission hnuaia programme pakhat - School Health Programme chuan Mizoram chhunga Sawrkar school zirtirtute chu School Health Module hmangin training an lo pe tawh thin a. tun tumah hian MSACS leh SCERT tawngkawp chuan Mizorama school naupang tam thei ang berin he zirtirna tha tak mai an dawn theih nan Private school zirtirtute chu training an pe thung a ni.  

Training hawnna inkhawm May ni 12 khan School-a hriselna lam hawi zirtirna training hawnna inkhawm chu SCERT Auditorium-ah neih a lo ni tawh a, MSACS Project Director, Dr. Jane Rinsangi Ralte chuan thu sawiin, zirtirtute chu naupangte ngaihsan (role model) an nih angin an thu kamchhuakte chu naupangten an ngai pawimawh thin a, chuvangin training-a an thil zirte chu an zirlaite hnenah tha taka zirtirturin a chah bawk. Training hawnna inkhawmah hian Dr. Jane Ralte chuan kan ram HIV dinhmun tarlangin, Kum 1990 atanga kumin March 2026 thlenga kan rama HIV kai pun dan te thlirho a ni a, MSACS in HIV do nana a hmalakna hrang hrangte tarlangin, he natna do tur hian Sawrkarte, pawl hrang hrangte leh mipuite tanho a tulzia a sawi. 

Kum 2024 leh 2025 chhung khan Mizoram a private school 552 te chu training pek an lo ni tawha, MSACS leh SCERT te chuan tun tumah hian private school training tura koh atanga School zirtirtu 50 zet an in ko khawm thei chu lawmawm an ti hle a ni. 

Training module-ah hian topic sawm pakhat (11) a awm a, chungte chu - Growing up Healthy, Emotional Wellbeing and Mental Health, Interpersonal Relationships, Values and Responsible Citizenship, Gender Equality, Nutrition Health and Sanitation, Prevention and Management of Substance Misuse, Promotion of Healthy Lifestyle, Reproductive health and HIV Prevention, Safety and Security Against Violence and Injuries, Promotion of Safe use of Internet and Social Media Behaviour te a ni a. Zirtirtu kalkhawmte chu heng topic hrang hrangte hi zirtir an ni. 

Training kharna inkhawm hi Pu PC. Vanlalruata, Deputy Director, SCERT hova neih a ni a, zirtirtute chu Participation Certificate hlan an ni.