531//2026-2027

Serchhip, the 14th May, 2024: Vawiin khan Home Minister Pu K. Sapdanga’n Police Training School, Thenzawlah hmasawnna ruhrel thar - PTS gate pui siam thar te, digital lab, indoor gymnasium leh Indoor Firearms Training Simulator te a hawng. Hawnna inkhawmah hian Mizoram DGP Pu Sharad Agarwal, IPS leh Mizoram Police-a senior officer thenkhat leh department dang atangin officer eng emaw zat an tel a ni.

Home Minister Pu K. Sapdanga chuan Police Department in “Year of Discipline” programme thar a kalpui chu hêng hmalakna tharte hian nasa taka a tanpui a beisei thu a sawi a. Police hnaah discipline, professional conduct leh physical fitness te a pawimawhzia sawiin PTS-a training standard a tihsan lehzual tur thu a sawi bawk. 70th Batch Recruit Constable trainees-te lakah pawh beiseina sang tak a neih thu sawiin, recruitment process dik tak leh langtlang taka kalpui an nih ang ngeia Mizoram tana police force professional leh thiam tak an nih zel a beisei thu a sawi bawk.

• PTS Main Gate: PTS Main Gate thar hi sum awm remchang ang ang hmanga sak niin, mi dang ruai lova PTS-a thawkte leh training laite’n an sak liau liau a nih vangin sum tlemte sengin tha takin siam a ni a.

• Digital Laboratory: Police training tih tunlai (modernize) zelna atan Digital Lab., computer set 20 leng neih thar a ni bawk a. Hei hian computer zirna tihchangtlun, digital learning leh ICT-enabled training atan nasa taka a puih beisei a ni.

• Firearms Training Simulator: Police training laite’n dik tak leh him zawka silai khawih leh kah an zir theihna tur Firearms Training Simulator thar pawh din a ni a. He Simulator-ah hian AK-47, INSAS, Glock pistol leh silai dangte a rualin a kah theih a ni.

• Gymnasium: Taksa tihchaka vawn hrisel nan Gymnasium siam thar siam a ni bawk a. Building awmsa siam that niin gym bungraw thar changkang tak tak dah thar a ni a, Police training-te leh staff-te tan a tangkai hle tura ngaih a ni.

Heng hmasawnna thar hi Mizoram Home Minister leh DGP te hmalaknain, Assistance to States & UTs for Modernisation of Police (ASUMP) Scheme hmangtein a a hun tak tihhlawhtlin an ni a. Heng hmalakna thar hrang hrangte hian Police Training School-in police training tih changtlun leh tih hmasawnna a ngaih pawimawhzia a tilang bawk a ni.