530/2026-2027

Saitual, the 14th May, 2026: Vawiin khan DC conference room Saitualah, Saitual District Disaster Management Authority (DDMA) chu an Chairperson, District Bawrhsap ni bawk Pu Srinivas Sadi kaihhruaiin kumin fur laia chhiatna hrang hrang thleng thei laka inpuahchahna hrang hrang sawiin an thu khawm.

He hunah hian DDMA Chairperson Pu Srinivas Sadi chuan thu a sawi a, fur lo thleng turah DDMA member te chu an pawimawh hle a ni tih sawiin, theih tawpa lo inhmakhua lawk a tul a ni, a ti. Bawrhsap chuan tui thianghlim lo in atanga natna kai theih te enkawlna tur damdawi chu Saitual District chhunga PHC bakah Sub-centre zawng zawngah dah a nih theih nan hma an lak tur thu a sawi a, hei bakah hian khuarel chhiatna thleng thulha inenkawlna tur damdawi te pawh sem chhuah tura hma lak a nih tur thu a sawi.

Pu Srinivas Sadi chuan khuarel chhiatna thleng thulha che chhuak thei tur Quick Response Team (QRT) an awm bakah harsatna a thlenin mipuite chuan engtik lai pawhin District Emergency Operation Centre (DEOC), phone no. 9862708344-ah hian an be pawp thei dawn bawk a ni, a ti.

Vawiin thutkhawm hi DDMA Chairperson & DC Pu Srinivas Sadi chuan a kai hruai a, DDMA member te an tel bawk a ni.