1929/2022-2023
Kolasib dated 15th September 2022: Vawiin khan I&PR Conference Hall, Kolasibah Samagra Siksha leh Science Teachers Association Mizoram (STAM) tangkawp buatsaihin ‘Understanding Eco-System for Health & Wellbeing’ tih thupui hmangin 30th District Level Children’s Science Congress 2022, Kolasib District neih a ni a. Pu PC Lalngaizuala, District Education Officer-in hun kaihruaiin Pu John LT Sanga, Deputy Commissioner-in Children Science Congress 2022 hawnna hun hi a hmang bawk a ni.

Pu John LT Sanga, Deputy Commissioner chuan zirlaiten zirna kawnga an thiam thil pho lanna hun, ‘District Level Children’s Science Congress’ buatsaih a ni chu lawmawm a tih thu sawiin an zirna atanga ngaihtuahna thar leh thil thar tangkai hmuhchhuahna kawngah hmasawn tum zel turin zirlai kalkhawmte a chah. Science chu hriat lohna atanga hriatna pe theitu, zawhna tam tak chhanna petu leh mihring khawsak hmasawnna atan a pawimawh berte zing a mi a nih thu Deputy Commissioner chuan sawiin thiamna kawnga intlansiaknaah chuan a taima leh tumruh apiang tan hlawhtlinna a awm thu a sawi bawk a ni.

Pu Laldingliana, District Coordinator, Children’s Science Congress tarlan danin 2010 atang khan kum tinin District Level Children’s Science Congress hi buatsaih thin niin State Level leh National Level thleng a kalpui thin a nih thu a sawi a. Science hmanga vantlang nun tih hmasawnna kawng a ngaihtuahna leh ruahmanna thar a awm theih nan Science lam a tui zirlaite inphochhuah nana buatsaih thin a nih thu a sawi bawk a ni.

Vawiin 30th District Level Children’s Science Congress 2022, Kolasib district-a neih ah hian Govt. Diakkawn High School, Govt. Kolasib High School, Hmar veng High School leh Brighter Faith Middle School atangin zirlaite an tel a. Angela Lalhmunsiami leh Vanlalpeki, Govt. Diakkawn High School-te chu pakhatna niin ‘Study & Analysis of Water Quality of different Community Freshwater in Kolasib Town’ tih thupui hmangin presentation an pe a. Esther Lalrengpuii leh Laltlanhlui, Hmar Veng High School-ten ‘Preservation of Ecosystem by using Non-Conventional Energy i.e. Biogas’ tih thupui hmang a presentation an pek chuan pahnihna lawmman an la a ni.