1930/2022-2023
Lunglei the 15th September, 2022 - Civil Hospital Lungleia tui chhia sawngbawlna khawl – Effluent Treatment Plant ruahman tur pualin vawiin khan a bultanna Ground Breaking Ceremony chu Lunglei DC Pu Kulothungan A hova neih a ni. He plant hi Central Warehousing Corporation (CWC) atanga Corporate Social Responsibility (CSR) cheng nuai 17.61 kaltlanga ruahman tur a ni.

Hemi puala hun tawi hmanah Lunglei DC Pu Kulothungan A chuan hmasawnna daih rei leh tlo nei tur chuan mipuite hriselna a pawimawh hmasa takzet a ni tiin tun hnaiah Lunglei District tan CSR kaltlanga Ambulance pali neih thar anih thu leh tun dinhmunah District mamawh em em Blood Donation Van pawh ruahman leh thuai a tum thu a sawi a. Civil Hospital Lunglei tana Effluent Treatment Plant CSR kaltlanga petu Central Warehousing Corporation (CWC) te chungah lawmthu sawiin kumin chhung ngei hman theih tura hna thawk turin a ngen a ni.

Ground Breaking Ceremony-ah hian Civil Hospital Medical Superintendent Dr SR Ngurchamliana, Lunglei Additional DC Pu Donny Lalruatsanga, Central Warehousing Corporation (CWC) Superintendent Pu Bidyut Basumatary leh sawm bik dangte an tel a ni.

Effluent Treatment Plant awmna tur hi a zau zawng 18x9 feet niin Civil Hospital Lunglei building hnung lamah dah tur a ni a, khawl hi phai lam atanga chah chhuak turin hmalak mek niin kumin chhunga hman nghal theih tura beisei a ni