1931/2022-2023
Aizawl 15th September 2022: Nimin Ni 14.9.2022-a Mizoram sawrkar aiawh a Outlook-Swaraj Award 2022 a dawn zawh ah Agriculture, Irrigation leh Cooperation Minister Pu C. Lalrinsanga chuan Delhi ah Mizoram mamawh te sawiin mi pawimawh hrang hrang hmuin hun a hmang zui a.

Nimin tlai khan DoNER Minister Pu Kishan Reddy hmuin Mizoramin Agriculture lama hma a sawnna tur kawng hrang hrangte a sawipuiin Agriculture Infrastructure lama Mizoram mamawh te a thlen a. Minister Pu C. Lalrinsanga chuan, “Mizoram sawrkar in Agriculture lamah hmasawnna bung thar kai tumin nasa takin hma a la a. Tun tumah pawh hian North East State zingah Mizoram chuan Agriculture ah ti tha ber lawmman a la hial a. Hmasawnna nasa zawka kalpui tur chuan Agriculture Infrastructure lamah mamawh tam tak kan la neih te chu Sawkar laipui scheme piah lama kalpui a tul a ni” tiin DoNER Minister hnenah hian state mamawh te a thlen a. DoNER Minister hian a thu thlen te chu a ngaih pawimawh thu leh theihtawpa hma a lakpui tur thu a lo hrilh a ni.

Vawiin khan Agriculture Minister chuan National Productivity Council (NPC)-in an sawm angin Pu Sundeep Kumar Nayak IAS, Director General, National Productive Council leh a thawhpuite chu NPC Committee room, New Delhi ah meeting a neihpui a. Meeting-ah hian Mizoram in Agriculture, Irrigation leh Cooperative sector lama hmasawnna nasa zawk a neih theih dan tur leh hemi kawnga NPC nena thawhho theih dan tur kawng hrang hrang sawiho a ni a. National Productive Council hotute chuan Mizoram chu Agri Business leh Business Process re-engineering ah te thawhpui tura an inhawn thute sawiin inbiakna pawh la chhunzawm zel turin Minister ho hian rel a ni.

Minister Pu C. Lalrinsanga hian Delhi a cham chhungin Union Ministry lama mi pawimawh te hmu in hun a la hmang chhunzawm dawn a ni.

Minister hi Pu James Vanlalluaia, Addl Director, Agriculture Deptt, Govt of Mizoram leh Pu Simon Rosangliana, Asst Director ten an tawiawm a ni.