Nimin (27.6.2019) zing dar 7:30 Am khan Lunglei Police Station kawt ah 30th Road Safety Week hawnna hun hman a ni.

Pi K.Lalrinzuali, Deputy Commissioner, Lunglei chuan khuallian niin ribbon chep chat in 30th Road Safety Week hi a hawng. Kumin thupui chu "Lamlian himna hi nunhimna ani"

30th Road Safety Week hawnna inkhawm hi Pu Vanlaltanpuia, MCS, DTO Lunglei in kaihruaiin Pi K. Lalrinzuali chuan Road Safety Week hman hi a tangkai a, lirthei khaltu leh mipui te tan hlawkna tam tak a thlen ani. Kum 2014 atang khan Mizoram ah Road Accident, thi leh hliam pawh an tlem telh telh thu a sawi. Lirthei khaltu leh kawngpui hmangtu te hian dan hi kan la ngaipawimawh tawk lo hle a, ram changkang ah chuan dan an ngaipawimawh avangin chetsualna a tlem hle ani ati. Dan hi mipui te lungrual nan leh himna atan siam ani a, Two Wheeler khalhtu tam tak pawhin Helmet khum hi Traffic Police vanga khum ah an inngai a, sorkar in kemahni himna tur atan a dan siam ani a, kawngpui hmangtu mipui te hian dan hi kan pawm a ngaih thu a sawi. Road Safety Week chhung chauh  hi fimkhur nan hmang lovin kumtluana dan ngaipawimawh chung a hmang theuh tur in a chah ani.

Pu Lalthanmawia, Supt. of Police, Lunglei pawh in thusawiin India ram hi khawvel ngaihtuahin Road Accident tamna ani a, hemi anih avangin kum 1983 khan Surface & Road Transport Minister hmalakna in chetsualna a tlen tlem nan National level ah National Road Safety Council, State ah State Road Safety Council leh District level ah District Road Safety Committee te din anih a, hemi in a tum ber chu lirthei khalhtu te leh kawngpui hmang tu zawng zawng te kan him nan a ruahman a ni ati. Karkhat chhung chauh nilovin engtik lai pawh in kan fimkhur tur ani tiin Week hman chhunga dan bawhchhia chu ngainatthiamna awmlo va hrem an ni ang a ti. Lunglei District chhungah major accident vawi 4 awmin mithi 7 an awm thu a sawi, India sorkar in kum 2020 ah road accident 50% vel a tlakhniam tir tum niin minute 1 ah accident 1 thleng leh minute 4 ah mi 1 thi awm angin mithiam ten an chhut a, India ram ah kumtin accident vawi 1,400,000 aia tam thlengin 75% hi driver te mawhphurna niin 25% chu khawl leh kawng that loh vang ani ati. Sorkar in a tum ber chu accident laka mipui vantlang him hi ani, chuvangin Driver motor khalh lai a rilru la peng thin tu Mobile Phone hman, Zu rui chunga motor khalh, tlan chak lutuk leh phurh rih lutuk te hi sorkar phalloh anih avangin zawm theuh turin  a chah ani.