Nimin (27.6.2019) khan Kolasib Diakkawn Square ah road Safety week vawi 30 na chu District transport Officer Pu H Lalhmingliana kaihhruaina hnuaiah District Bawrhsap Pu Zoengsanga’n a hawng.

Bawrhsap chuan Road Safety week thil tum te sawi zauin lirthei thununtu te bakah lirthei nei tu te tana kawng hrang hranga in tuaithar a ngaih thu te, traffic dan zawm that te bakah hawihhawm taka lirthei thunun leh lirthei hun/dah/park a pawimawh thu te a sawi a. Mihring kea kal te tana hlauhawm khawpa lirthei khalh, chak tak taka lirthei khalh leh kum tlinglo lirthei khalh te chu ngun taka vai an ni dawn a, lirthei chetsualna te chu ti hniam zel turin tan lak a ngaih thu tarlang bawkin Road Safety Week hi kar khat chauh ni lovin kan nitin nunah zawm tum a pawimawh thu a sawi bawk.  Bawrhsap chuan Mizoram pum ah Kum 2014-ah accident 132, thi 103, hliam 234, Kum 2015-ah accident 68, thi 71, hliam 117, Kum 2016-ah accident 72, thi 59, hliam 97, Kum 2017-ah accident 68, thi 60, hliam 55, Kum 2018-ah accident 53, thi 45, hliam 30 an awm thu tarlangin accident tla hniam zel chu thil lawmawm a nih rualin, tan lakna tur kawng tamtak ala awm ani a ti.

Road Safety week chhung hian No Tolerance Week hman ani dawn bawka, lirthei che vel te chu uluk taka endik an ni dawn a, ni 29 hian DIPRO Conference hall ah lirthei thununtu te tan intuaitharna hun hman ani bawk ang.