Nimin (27.6.2019) chawhma khan Lunglei DC Pi K. Lalrinzuali chuan a office chamber-ah Mizoram sawrkarin Accredited Journalist atana a thlan thar mi 19-te hnenah Press Accreditation Card a hlan.

Lunglei DC Pi K. Lalrinzuali chuan Mizoram sawrkarin Accredited Journalist atana Lunglei District chhunga chanchinbu mite zinga mi 19 lai a rawn thlang chhuak chu lawmawm a tih thu sawiin an Accreditation Card chu tangkai taka hmang turin duhsakna a hlan a. Media mi te chu thudik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a. Sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah bawk.

Accreditation Card inhlanna inkhawm hi Lunglei DIPRO Pi C. Lalremruati’n kaihruaiin Lunglei District MJA President Pu H.Lalthansanga leh Hnahthial Sub Division MJA President Pu C. Lalbuatsaiha te pawhin thu an sawi.

Press Accreditation Card hlan thar te hi Lunglei khaw chhunga media mi 15 leh Hnahthial atangin mi 4, an vain 19 an ni.