School Education Department buatsaih 33rd Mizoram Secondary School Games, 2015, ni 13-16 October 2015 chhunga neih chu vawiin chawhnu dar 2:30 khan Hawla Indoor Stadium, Republic Veng ah khar a ni a, Education Minister Pu H.Rohluna’n a hmanpui.

School Games kharna inkhawma thu sawiin Minister chuan Mizoram chu tlangram, khelmual tha siam harsatna ni mah se Sawrkar hmalakna azarah infiamna tihchangtlun nan kawng hrang hranga hmalak a ni, a ti a. Chumi zarah ram pum huapa intihsiakna ah pawh hlawhtlinna tam tak kan chang tawh a ni, a ti. Subroto Cup U-14 ah Mizoram-in champion nihna kan hauh thei te chu a ropui hle a ni, a ti bawk. Infiamna kan uar zel laiin zirna lamah pawh hma kan sawn zel a tul a ni tiin Pu H.Rohluna chuan lehkhathiamna tel lo thiamna chuan tawp chin a nei tih hre renga, zirna tibahlah lova infiamna kalpui thiam turin zirlai kalkhawmte chu a fuih bawk.

Mizoram Secondary School Games kharna inkhawm hi School Education Director Pu K.Lalthawmmawia’n a kaihruai a, Games hlawhtling taka neih a nih theih nana buaipuitu leh zirlai zawng zawng te chungah lawmthu a sawi a, Games an hman chuan inelna piah lamah mihringte inlaichinna leh nunhona ah te hlawkna nasa tak a thlen ngei a beisei thu te a tarlang bawk. Games kharna inkhawm ah hian Organising Secretary Pi C.Lalmalsawmi’n report a pe a, Minister hian inelnaa titha te hnenah lawmman a sem nghal bawk a ni.

33rd Mizoram Secondary School Games 2015 ah hian Mizoram District tin atangin zirlai infiam mite an lo tel kim thei a, intihsiakna ah hian zirlai 557 leh zirtirtu/official 55 an tel a ni. Infiamna chi hrang hrang Athletics, Basketball, Badminton, Football, Table Tennis, Taekwondo leh Volleyball ah te inelna neih a ni a, a pumpuia titha ber chu Aizawl District niin Medal 28 an la a, Champhai District pahnihna chuan Medal 23 lain pathumna Kolasib District chuan Medal 22 an la a ni.