Vawiin khan Health Department Programme peng pawimawh tak pakhat, Non Communicable Diseases hnuaia National Programme for Prevention of cancer, Diabetes, Cardiovascular diseases and Stroke (NPCDCS) chuan Bawngkawn Chhimveng Presbyterian Kohhran Hall-ah Awareness Campaign cum NCD Screening Clinic an buatsaih.

He awareness campaign hi Dr. C.Lalliankimi,Medical Officer District NCD Clinic in a kaihruai a. Hunserh hi Pi Rosiamliani, Local Council Member in a hmang a. Non Communicable Diseases kan tih, cancer, thisen sang, zunthlum, stroke leh a kaihhnawih natna hrang hrang chungchanga hriattur pawimawhte Dr. Babie Zirnunsangi State Programme Coordinator, NPCDCS in a sawi a. Pu C.Rambuatsaiha Vice Chairman, Local Council in vote of thanks sawiin awareness bik hi tih tawp a ni.

Hemi hnu hian NCD Clinic neih chhunzawm a ni a. Bawngkawn leh Ramhlun North chhehvel atangin damlo mi 170 bawr an in entir a. Blood Sugar test, BP Check, BMI (rih zawng leh san zawng bakah thau lutuk enna) Pap Smear (Chhul hmawr test, FNAC, Physiotherapy, Councelling leh Gneral Clinic te neih a ni a. Damlo te hi a thlawnin an en vek a ni.

NCD Cell te hian hun engemaw chen atang khan an hmalakna hi chak takin an kalpui mek a. Tunah pawh hian Aizawl leh a chhehvel veng hrang hrangah Awareness Campaign leh NCD Clinic Programme duangin hma an la chho zel dawn a ni.