Chief Minister Pu Lal Thanhawla chuan vawiin khan DC office tlak lama District Education Officer Office hmunah Education Centre Building sakna tur lungphum a phum.

Chief Minister chuan education department tan chuan vawiin hi ni pawimawh, ‘red letter day’ a ni a ti a. Helai hmun hi hmun pawimawh, district council hunlai atang tawha education hmunpui a ni a, building changtlung tak sak a ni tur hi a lawmawm tak meuh a ni a ti a. Education hi a pawimawh em avangin zirlaite tan world class leh quality education siam duhna avangin ‘Education Reforms Commission’ din a ni tiin, a taka kalpui turin sum thahnem tak angai a, chumi tihpuitlinna turin Planning Commission khan min duhsak hle a, mahse tih tawp anih tak avangin tunah hian NITI Aayog ah bawhzui mek a ni a ti.

Chief Minister chuan sum harsat laia Special Plan Fund atanga he building sakna tur kan hmu hi a lawmawm hle a ni tiin, sorkar building sak dawn reng rengin chhuan lo la kal leh zel tur thlir chunga duan a pawimawh a ni a ti a. Tuna building sak turah hian motor parkna tur leh lift dah tura ruahman a ni hi a lawmawm hle a ni a ti a. Infrastructure tha leh quality hmasawnna tur kan ngaihpawimawh a tul hle a ni a ti. Chief Minister chuan educationah hma kan sawn zelna turin education department chu duhsakna a hlan a ni.

School Education Minister Pu H.Rohluna pawhin thu sawiin, education office a upa ber sak that a ni tur chu a lawmawm hle a ni a ti a. Lunglei leh Serchhipah education complex sa turin ruahmanna siam mek anih thu a sawi a. DIET leh a hostel building pawh thuam that tum a ni a ti.

Education Centre building sakna tur hi kum 2014-15 chhung khan Special Plan Assistance atangin Rs.800 lakhs hmuh a ni a, sum pawh sanction fel vek tawh a ni. A sa tur hian Lushai Engineers, Ramhlun, Aizawl chu thlan a ni a. Tuna building hlui tawh tak, DEO leh SDEO ten office atana an luah thin pawh an chhuahsan tawh a, sak hna tan nghal theih a ni.

A building tur hi basement 3 bakah floor 4 a sanga sak tur niin, a dung hi 85 ft leh avang hi 41 ft a lian a ni ang a, motor LMV 12 parkna tur leh two wheeler 60-70 dah theihna tur siam ani dawn a, hemi bakah inkhai chhohna ‘lift’ dah a ni bawk ang. Sak zawh anih hunah DEO Office atan leh SDEO Office, Aizawl East, West leh South ten an luah ang. Floor tinah emergency exit leh fire escape stairs dah vek a ni bawk ang.

Lungphum phum inkhawm hi helai hmun bula MZP Pisa hnuaia parking lots ah neiin School Education Director Pu K.Lalthawmmawia, IAS in a kaihruai a, Chief Minister hi Ministers, Parliamentary secretary leh MLA ten an tawiawm a ni.