Vawiin khan Mizoram Civil Service Association chuan Tourist Lodge Conference Hall, Chaltlang-ah General Conference vawi 34-na an hmang a. Agriculture Minister leh MCSA President hlui lo ni tawh thin Pu H. Liansailova chu Khuallian a ni.
 
 
Mizoram hmun hrang hrang atanga Conference hmang tura kalkhawm MCS officers te hmaa thusawiin Khuallian chuan sorkar hna pawimawh tak tak khawihtu an nihnaah mipuite tana thawk an nih tih hre reng tur leh sorkar hnathawk dang te tan hlemhletna laka fihlimna kawngah pawh MCS te chu entawntlak ni turin a chah a ni. NLUP chungchang sawiin Minister chuan hei hi Party programme ni lovin sorkar programme a ni a, a hlawhtling turin theihtawp kan chhuah a ngai a. NLUP kaltlanga sum dawngtuten ti chingpen lova dik taka sum an hmang ngei a ni tih finfiah (monitoring) chu sorkarin uluk takin kalpui a tum a, hemi kawngah pawh hian MCS officers te chu an tangkaiin an pawimawh hle dawn a ni, a ti. Sorkarin ram thatna tura programme hrang hrang a duan te chu sorkar officer leh hnathawk ten an veipuia, tih tak zetna nen an ngaihtuahpui loh chuan hnam a ding chhuak theih loh thusawiin Minister chuan nuara sorkar nawr vak vak ang chi chu tihdanphungah nei lova, hemi kawngah pawh MCS te chu hmahruaitu an ni tura a duh thu a sawi bawk.

MCSA President Pu P. Lalchhuanga chuan thuhmahruai a sawinaah MCS tana hmathatna an duh thenkhatte Minister hmaah a tarlang a. MCS officers te tan training hrang hrang buatsaih zing deuh nise, a bik takin sorkar laipuiin ram pumah e-governance kalpui thuai a tum avangin MCS officers te pawh hemi lama training an mamawh thu a sawi.

Vawiina neih tak 34th MCSA General Conference-ah hruaitu thar thlanna neih nghal a ni a. An thu ngaihtuah zingah IAS Cadre hrang neih, Combined Competitive Examination, District/Sub-Division tih changtlun, Cadre Review/Amendment of Service Rules leh an pawl pisa din chungchangte an rel ho a ni.

Attachment

  • Loading attachment...