35^th Mizoram Secondary School Games 2017 chu vawiin khan AR Ground, Aizawl-ah khar a ni a, Pu H.Rohluna, School Education Minister chuan khuallian niin a hmanpui.

Games kharna inkhawm buatsaihah hian Pu H.Rohluna chuan zirna a titha turin taksa hrisel a pawimawh a, taksa hrisel nei tur chuan taksa sawizawi leh infiamna hi a pawimawh a ni a ti a. Zirlai ten taksa hrisel an neih theih nan leh an theihna te tihpun a nih nan school games hi buatsaih a ni a ti. Minister chuan infiamna chi hrang hrangah Mizo te’n hma kan sawn chho zel leh a ber dinhmun kan luah chho zel chu lawmawm a tih thu sawiin, thalai te theihna hriain sorkar chuan hmunhma tha a buatsaih zel a ni a ti a, thalai mahni inthunun thei hlawhtlinna chang an awm zel chu lawmawm a tih thu a sawi. Minister chuan zirlai kalkhawmte chu ruihthei thil laka fihlim tur leh mahni inthunun a hmalam pan zel turin a fuih a ni.

35^th Mizoram Secondary School Games, 2017 hi 31^st October – 3^rd November, 2017 chhung khan neih a ni a. District anga inelna hi neih niin, District School Games a titha ten district ai an awh a ni. Kuminah hian Athletics, Badminton, Basketball, Football, Table Tennis, Taekondo leh Volleyball-ah te inelna neih a ni a, a pumpuiah Aizawl District chuan Gold 16, Silver 8 leh Bronze 7 la in champion a ni a. Best Athlete (Boys) chu Lalnunpuia. Class-IX, Nazareth Academy, Lunglei a ni a, Best Athlete (Girls) chu Lalvenhimi A.Cony, Class-X, Govt.Lallengvunga H/S, Serchhip District a ni.