Vawiin khan Lawngtlai AH & Vety Complex-a Farmers’ Training Hall-ah New Economic Development Policy (NEDP) hnuaia vawk leh ar vulhtute tanpuina sem a ni.

NEDP tanpuina semna hun hi Lawngtlai DVO Dr B. Zonghinga chuan a kaihruai a. He hun hmanpuitu LADC-a AH & Vety changtu Executive Member Pu C. Lalneihkhuma chuan sawrkarin mipuite tan hna thawkin, mi retheite chawi kan nan ruahmanna hrang hrang a siam a, chu’ng ruahmanna zinga mi NLUP hma lakna thlawptu NEDP a taka kalpui a ni ta chu lawmawm a tih thu sawiin, kut hna thawktute’n an hlawhtlinpui ngei a beisei thu a sawi a. Tanpuina dawngtute chuan sawrkar duh dan hre reng a, an tanpuina dawnte a nih dan tur taka hmanga din chhuahpui ngei tum turin a chah a. Thu a sawi zawhin NEDP tanpuina sum chu a dawngtute hnenah a hlan nghal a ni.

Lawngtlai District-ah hian NEDP atanga vawk vulh (piggery trade) tanpuina dawngtu (beneficiary) mi 43 leh ar vulh (poultry trade) tanpuina dawng mi 4 an awm a. Tuna 1^st instalment pek chhuah hi a in sakna, vawkte/arte leina leh a chaw leina tur niin, vawk vulhin Rs 36,000/- leh ar vulhin Rs 52,740/- theuh an dawng phawt a ni.