Vawiin hian 36 - Tuichawng Assembly Constituency chhunga Polling Station a duty tur zawng zawng, Presiding Officer, First, Second leh Third Polling Officer leh Reserve Officer ten Lawngtlaiah Training an nei. Tun tum a an training hi a tum thumna niin inthlanna neih a nih hmaa an training hnuhnung ber tur a ni.

He training na a tel te hi an tam tham avangin hmun thumah thendarh an ni a, Lawngtlai MJA Conference Hall ah Polling Station Serial Number 1 atanga 30 ten training neiin, a bak Serial Number 31 atanga 57 ten Government Region Higher Secondary School Hall pahnihah training hi an nei ve thung a, MJA Conference Hall a training te hi Pu Vanlalchhuanawma, SDC in zirtirin, Government Region Higher Secondary School a training te hi Pu Vanlaltanpuia, SDC leh Pu M. Misael, BDO Lawngtlai ten an zirtir ve thung a ni.

Training naah hian Polling Station a Duty turten report an thehluh dan tur te, Complaint a awm thulha Security lam hotute nena inbiak pawh dan te bakah Statutory and Non- Statutory Forms hrang hrang fill up dan te a taka ti chhinin an zira, Vote thlakna khawl hman dan pawh a tumkhatna leh a tumhnihna traininga an zir tawhte an chian tawk leh tawkloh enchhinin uluk takin an zir nawn leh a ni.

Lawngtlai District ah hian Polling Station ke a kal thlen ngai 18 a awm a, lawnga thlen ngai 4 a awm bawka, hei bakah hian thlithlai zual ngai (Critical Polling Station) 7 a awm bawk a, heng hmunah te hian tute pawh duty theih a nih avangin heng hmuna a hun taka thlen dan leh inthiar vel dan tur te pawh tun tum training hian an sawiho leh bawk a ni.

Tuichawng Constituency bikah hian Election Management Plan-a a lan danin khaw 81 leh Polling Station 57 a awm a, vote thlak thei mipui hi 26268 awmin an zing a 13080 hi hmeichhia an ni.