Vawiin khan Vanapa Hall-ah Aizawl district huamchhunga Assembly Constituency pahnih, Tawi leh Aizawl South-III atana Presiding Officer leh 1st Polling Officer- te tan training buatsaih a ni.

Training hi Returning Officer, Pu V. Lalengmawia, Dy. Secretary, RD Department chuan pein,inthlanna thianghlim tak a awm theih nan mawhphurhna sang tak leh pawimawh tak an neih thu leh, fimkhur taka an hna chanpual te hlenchhuak turin a chah a. Presiding Officer leh Polling Officer-ten ruat an nih atanga an mawhphurhna hrang hrangte tarlangin; Inthlannia mipuiin vote an thlak hmaa polling agent-te nena mock poll neih dan tur te, Form chi hrang hrang hman dan te, EVM hman dan bakah inthlan kaihhnawiha dan hman tur hrang hrangte chipchiar takin an zirho a ni.

Tawi leh Aizawl South-III Assembly Constituency-te hi VVPAT hmanlohna tur niin, Polling Station 49 a awm a, voters hi ni 16 August, 2013 thleng khan mi 32,087 an awm a ni.

Vawiin vek hian Chanmari YMA Hall-ah pawh Tuivawl leh Chalfilh Assembly Constituency-a Presiding Officer leh 1st Polling Officer-te tan, ARO Pi Zosangzuali Pachuau, HRD Officer, SIPMIU chuan zirtirna a pe bawk.