Nimin ni 8.8.2012 khan 3F Oil Palm Ltd. neitupa, he Company Director ni bawk Sanjay Goenka chuan Hyderabad atanga Aizawl lo thlengin Agriculture Minister Pu H. Liansailova chu a Office-ah a kawm a, Mizorama Oil Palm Mill din dan turte leh Oil Palm chin kawnga hmalak zel dan turte a sawipui. 3F Oil Palm Ltd. hian Aizawl leh Serchhip District-a Oil Palm chin te an enkawl mek a, Oil Palm Mill dinna tur pawh Mat kamah ruahman fel tawh a ni. He Oil Palm Mill dinna tur atan hian RKVY Scheme atangin Rs.25,00,00,000.00 (Cheng nuai sanghnih zanga) dah a ni tawh nghe nghe a ni. A khawl hi order fel vek tawh niin hun remchang hmasa berah a lungphum pawh phum tum a ni.

3F Oil Palm Ltd. te hian kumina Aizawl leh Serchhip District tana Seedling mamawh ang an neih theih loh avangin pawi an ti hle a, kum thar atana target ruahman chu tlin theih ngei turin ruahmanna siam an tum thu he Company neitu hian a sawi.

Vawiin khan Sanjay Goenka, 3F Oil Palm Ltd. Director leh Dr. C. Lalzarliana, Department of Agriculture (Crop Husbandry) Director te chuan Thenzawl rama Oil Palm chinna hmun thenkhat leh Oil Palm Mill (Factory) dinna hmun tura ruahman te chu a hmunah tlawhin Nursery hmun te pawh an tlawh nghal bawk.